Әле ул иген культураларының һәр төрөн сәсә. Ер эше менән генә әллә ни ыратып булмағас, күпләп мал да аҫрай Ялсыҡай ауылында йәшәгән Сарбаевтар ғаиләһе. Нисек өлгөрәләрҙер: кәртә, ихата тулы мал-тыуар, ҡош-ҡорт, умарта... Һыйырҙары, аттары күп, сусҡалары ишле, һарыҡтары 100-ләп башҡа етә. Мәшәҡәт тауыҡ сүпләһә лә бөтөрлөк түгел, ең һыҙғанып эшлә лә эшлә генә!
Фермер хужалығы ойошторғанда, элекке хужалыҡ малсыһы Хафиздың үҙенең ДТ-75, Т-40 тракторҙары була. Әйткәндәй, колхоз-совхоздар тарҡалған саҡта ҡайһы берәүҙәр анһат ҡына техника эләктерһә, уға бер сәскес тә тәтемәй. Яйлап аҡса туплап, комбайн, тағылма ҡорамалдар, МТС-82, бесән йыйғыс һатып ала.
— Былтыр бесән һәйбәт булды, етерлек, — ти фермер. — Бойҙайҙы йыйып алғас та һаттым, ә бына арыштың хаҡы түбән — тоннаһы 3 мең 200 һумдан артмай, элекке йыл 4 мең 800-ҙән төшмәне. Ермолаев араҡы-спирт заводы 5 мең 200 һумдан ҡабул иткәйне. Арыш уңды, гектарынан 30-35 центнер самаһы сыҡты, Маяҡ элеваторында әле 90 тоннанан ашыуы ята. Алыпһатарҙарға ярым-ярты хаҡҡа тоттороп ебәрге килмәй. Мәҫәлән, сусҡа итенең килограмын улар 110-120 һумдан ала, беҙ йәрминкә һайын ике баш һуйып, уртаса 200 һумдан һатабыҙ.
— Сарбаевтар — икеһе лә иҫ киткес егәрле, әүҙем кешеләр, ҡулдарынан килмәгән эш юҡ. Ярҙам һорамаһаң да, Ураҙа, Ҡорбан ғәйеттәрен уҙғарырға йыл һайын һарыҡ бирәләр, Яңы йыл байрамына балаларға, ауылдаштарына бүләк һатып алалар. Хафиз — көрәшсе, Гөлсәсәк матур итеп йырлай. Донъяға һөйөү менән баҡҡан бик матур, уңған, ярҙамсыл ғаилә. Улар кеүек кешеләр күберәк булһа икән, — ти Таймаҫ ауыл Советы хакимиәте башлығы Рәйсә Нәжип ҡыҙы Яныбаева.
Һәр эшкә тырыш, тәүәккәл Сарбаевтарҙың балалары ла аҡыллы, эшһөйәр. Ҡыҙҙары Русалина Башҡорт дәүләт медицина университетында белем ала. Күмертау педагогия колледжын тамамлаған улдары Фәнзил баш ҡалала эшләп йөрөй.
Фермер булыуы еңелдән түгел, бик күп көс, сығым талап ителә. Ал да, ял да юҡ ер кешеһенә, әммә Хафиз кеүек кендеге ергә береккән кешеләр башҡаса көн итә алмай. Тырышлығы бушҡа китмәй уның: ғаиләһе етеш йәшәй, кеше араһында абруйы бар. Быға тиклем район хакимиәте, Башҡортостан Ауыл хужалығы министрлығының Маҡтау грамоталарына лайыҡ булған Хафиз Хәйҙәр улы Рәсәйҙең "Алтын көҙ-2013" агросәнәғәт күргәҙмәһендә бронза миҙал яуланы.