l 2013 йылдың 5 ноябрендәге "Транспорт һалымы тураһында"ғы Башҡортостан Республикаһы Законына үҙгәрештәр индереү хаҡында"ғы 8-се республика Законы ил төбәктәрендәге транспорт һалымы тураһындағы ҡануниәт нигеҙендә һалым һалыуҙы ҡулайлаштырыу, һалым ташламаларының һөҙөмтәлелеген баһалау маҡсатында әҙерләнде.
Транспорт һалымы ставкаһы элек билдәләнгән мәлдән арттырылманы. Инфляцияға бәйле, был һалым төрө күләме йылдан-йыл кәмей бара. Һөҙөмтәлә айырым кешеләр өсөн транспорт һалымы ставкаһы беҙҙә, Волга буйы федераль округы менән сағыштырғанда, 1,5-4,9 тапҡырға түбәнерәк. Яңы Законда транспорт һалымын арттырырға тәҡдим ителә.
Бюджетты проектлау буйынса ведомство-ара Хөкүмәт комиссияһы ҡарарына ярашлы, ауыл хужалығы тауары етештереү менән шөғөлләнгән колхоз, совхоз, крәҫтиән (фермер) хужалыҡтары һәм башҡа ойошмаларға бирелгән транспорт сараларына ҡарата ташламалар һөҙөмтәһеҙ тип танылды.
Закон киләһе йылдың 1 ғинуарынан көсөнә инә.

l "Башҡортостан Республикаһының дәүләт граждан хеҙмәте өлкәһендәге айырым закон акттарына үҙгәрештәр индереү тураһында"ғы Закон ҡабул ителде.
2013 йылдың 5 апрелендәге "Рәсәй Федерацияһында дәүләт пенсия тәьминәте тураһында"ғы Федераль закондың 7-се статьяһына һәм "Рәсәй Федерацияһының дәүләт граждан хеҙмәте тураһында"ғы Федераль законға үҙгәрештәр индереү яңы законды ҡабул итеүгә нигеҙ булды.
Федераль законға ярашлы дәүләт органдарын үҙгәртеп ойоштороу төшөнсәһе дәүләт органын бөтөрөү, ябыу төшөнсәһе менән алмаштырыла, граждан хеҙмәткәренә вазифаһы ҡыҫҡартылған йәки дәүләт органы бөтөрөлгән осраҡта башҡа вазифаны башҡарыуға өҫтәмә гарантия ғәмәлгә индерелә, шулай уҡ уны һөнәри әҙерлеген үҙгәртеүгә, белемен камиллаштырыуға йәки стажировкаға ебәреү өсөн өҫтәмә нигеҙ билдәләнә.
Был закон "Башҡортостан Республикаһының дәүләт граждан хеҙмәте тураһында"ғы һәм "Башҡортостан Республикаһындағы дәүләт граждан хеҙмәткәрҙәрен һөнәри яҡтан ҡайтанан әҙерләү, квалификацияһын камиллаштырыу һәм стажировка үткәреү тураһында"ғы республика закондарына үҙгәрештәр индерә.

l "Башҡортостан Республикаһында ер мөнәсәбәттәрен көйләү тураһында"ғы Законға өҫтәмәләр индерелде. Был документты ҡабул итеү ер өлөшө йәки өлөштәре иҫәбенә бүленгән ер участкаһы күләмен билдәләү зарурлығына бәйле. Атап әйткәндә, закон ошондай участкаларҙы бүлеү тәртибен билдәләгән положениелар менән тулыландырыла.
Рәсми документ 7 ноябрҙә баҫылып сыҡты һәм ун көндән көсөнә инде.

l "Башҡортостан Республикаһында бала хоҡуҡтарының төп гарантиялары тураһында"ғы Законға үҙгәрештәр индереү хаҡында"ғы Башҡортостан Законы ҡабул ителде.
Был Закон әлегә тиклем ғәмәлдә булғанын балалар менән сауҙа итеүгә, уларҙы файҙаланыуға кәртә ҡуйыу, ошондай ғәмәлдәрҙең ҡорбаны булғандарға педагогик, психологик, медицина, юридик ярҙам күрһәтеү сараларын күҙ уңында тотҡан яңы статья менән тулыландыра. Унда шулай уҡ республикала бала хоҡуҡтарының төп гарантияларын тәьмин итеү принциптары асыҡлана.