Радий Хәбиров МХО яугирының әсәһе йшәгән йортҡа газ үткәрергә ҡушты

Белорет районында йәшәгән оло йәштәге ҡатындың ике улы һәм ейәне МХО-ла ҡатнаша. Ул йортона газ үткәреүҙә ярҙам һорап Башҡортостан Башлығына мөрәжәғәт итте.

Башҡортостан Башлығы менән тура бәйләнеш барышында Радий Хәбиров Белорет районы етәксеһе Азат Хәкимовҡа Боғанаҡ ауылында йәшәүсе Мөслихә Иҫәнғолованың йортона газ үткәреүҙе контролгә алырға ҡушты.

«Азат Салауат улы, был һорауҙы хәл итеүегеҙҙе һорайым. Иҫегеҙгә төшөрәм, газды йорттарға еткереү — бушлай. Әгәр ауылда зәңгәр яғыулыҡ юҡ икән, был проблеманы өйрәнергә кәрәк. Биш өй ҡалған һәр ауылға газ үткәреп булмауы аңлашыла. Шуға күрә мәсьәләгә асыҡлыҡ индерергә кәрәк. Бында айырым осраҡ. Ҡатындың ике улы һәм ейәне МХО-ла», — тине Радий Хәбиров.

Иҫегеҙгә төшөрәбеҙ Өфөлә Башҡортостан Башлығы Радий Хәбиров менән тура бәйләнеш бара. Республика Башлығы БСТ, «Рәсәй 24», «Башҡортостан 24», «Вся Уфа», «Сәләм», UTV, «Юлдаш» радиостанцияһында, шулай уҡ Башҡортостан Республикаһы Башлығы хакимиәтенең социаль селтәрҙәрендә халыҡтың иң көнүҙәк һорауҙарына тура эфирҙа яуап бирә.

Радий Хәбиров менән тура бәйләнештең модераторҙары – «Башинформ» мәғлүмәт агентлығының баш мөхәррире Руслан Шәрәфетдинов, «Башҡортостан Республикаһы» нәшриәт йортоноң генераль директоры Зөлфиә Рәхмәтуллина һәм Башҡортостан Башлығының матбуғат секретары Денис Ғәниев.

Башҡортостан Башлығы Радий Хәбиров менән Тура бәйләнештең текст трансляцияһы бында.