Баш ауырта, йоҡоһоҙлоҡ, арҡа һыҙлай, ҡолаҡтар шаулай, аяҡ һәм ҡул бармаҡтары ойой, хәлһеҙлек... Неврологтарға ошондай билдәләр менән йыш мөрәжәғәт итәләр. Ҡыҙғанысҡа ҡаршы, ваҡытында сараһын күрмәһәң, уларҙың патологияға әйләнеүе бар. Бөгөн паркинсон ауырыуы, мигрень, инсульт һәм уның эҙемтәләре, көҙән йыйырыу, умыртҡа һөйәгендәге протрузия, бүҫер айырым урын алып тора. Неврология сирҙәре менән табиптарҙың кәңәшенән башҡа үҙ алдыңа көрәшеү мөмкин түгел. Тик квалификациялы белгестәр генә уның төрөн дөрөҫ билдәләп, зарар килеү кимәлен асыҡлай ала.

Межгорье ҡалаһындағы 2-се поликлиникала ауырыуҙар өсөн барлыҡ шарттар булдырылған. Бөтә белгестәр ҙә бар бында. Физиотерапия, массаж, рентген, УЗИ кабинеттары эшләй. Анализдарҙы ла үҙҙәрендә бирергә була. Ә көндөҙгө стационарҙа һәр кем сәләмәтлеген нығыта ала.
Cәлиә Ибәтуллина поликлиникала невролог булып эшләй. Шулай уҡ көндөҙгө стационарҙа неврология бүлеген етәкләй. Үҙ эшен белеп, яратып башҡара ул. Шуға кабинеты алдында һәр ваҡыт сират ҙур була.



Көндөҙгө стационарға көн һайын 30-ҙан ашыу кеше килә. Ауырыуҙарҙы ҡабул итеп, һәр береһенә дауалау курсы билдәләргә кәрәк, шуға күрә ҡағыҙ эше менән дә күп булышырға тура килә табипҡа.

Сәлиә Ибәтуллина үҙе тураһында һөйләргә бөтөнләй яратмай. Ә бына ауырыуҙар һәм коллегалары уға ҡарата бик яҡшы мөнәсәбәттә.



Әйткәндәй, Хәфизә Йосоп ҡыҙы — көндөҙгө стационарҙа берҙән-бер шәфҡәт туташы. Уға ҡарап һоҡланмау мөмкин түгел. Барыһына ла система ҡуйып, укол яһап, дарыу биреп өлгөрә. Көн һайын бында ике-өс кеше урынлаша, әммә йөҙөндә берәй ризаһыҙлыҡ билдәһе булһасы. Үҙ эшен белеп кенә эшләп тик йөрөй.



Сәлиә Ибәтуллина уңған хужабикә, бына тигән әсәй ҙә икән. Бешеренергә ярата. Икмәкте һәр ваҡыт үҙе һала. Өҫтәле ҡамыр ризығынан бер ваҡытта ла өҙөлмәй. Баҡса тоталар, унда нимәләр генә үҫтермәй?! Тағы ла урманға сығып, еләк-емеш йыйырға, тәбиғәт ҡосағында булырға әүәҫ. Ә тәбиғәт бында иҫ китмәле. Урман эсендә генә ултырғас, бөрлөгән, көртмәле, ҡайын еләген йүгереп сығып ҡына йыйып инергә була.

Бына тигән өс балаға тәрбиә биргән кеше лә ул. Өлкән улы Салауат үҙенең юлынан китеп, баш ҡалала лор-табип булып эшләй. Азат Өфө дәүләт авиация техник университетын тамамлаған, ҡыҙы Гөлнур ҙа әле шул белем йортонда уҡып йөрөй. Әйткәндәй, “бишле”гә генә өлгәшә. Самира, Әминә, Илдар исемле ейән-ейәнсәрҙәренә яратҡан өләсәй ҙә ул.

Сәлиә Ниязбай ҡыҙы белемен туҡтауһыҙ камиллаштыра. Күп гәзит-журналдар алдырып уҡый. Интернетта эҙләнергә лә ярата. Шулай булмаһа, балалар табибы булып эшләп йөрөгән еренән, невролог кәрәк булғас, ҡабаттан уҡырға сығып китер инеме ни? Йылы һүҙ – йән аҙығы, тигәндәй, ауырыуҙарҙы ул дарыуҙар менән генә түгел, йылы һүҙе менән дә дауалай. Ә үҙенә күҙ төбәп килгән кешеләргә ниндәйҙер кимәлдә ярҙам итеү, уларҙың рәхмәт һүҙҙәрен ишетеү — табип өсөн оло бәхет.