Байрамса кейенгән, йөҙҙәрендә нур балҡыған, ҡараштарынан изгелек бөркөлгән ҡәрҙәштәребеҙ иртә менән иман йорттарына табан ағыла. Ир-егеттәрҙең күбеһе – ҡорбан салыу майҙансығында. Аҙан тауышынан һыҙылған таң тотош көнгә ҡеүәт биргәндәй. Мәсеттәрҙән аят-сүрәләр яңғырай, уларға һәр кемдең изге теләктәре, йылы һүҙҙәре, ышаныс һәм өмөт хистәре ҡушыла.

Ҡорбан ғәйетен республика­быҙ мосолмандары ошондай күркәм, татыулыҡ, шәфҡәтлелек бөркөлөп торған мөхиттә ҡаршы алды. Хал­ҡыбыҙҙың Ислам диненә йылдан-йыл нығыраҡ яҡынайыуы, хаҡ юлға ынтылыуы һөҙөмтәһе был. Ауыл-ҡалаларҙа мәсеттәрҙең арт­ҡан­дан-арта барыуы; мәхәллә­ләрҙең уңыш­лы эшмәкәрлеккә ынтылыуы; имам­дарҙың, белемен даими камиллаштырып, халыҡ араһында нығыраҡ абруй яулай ба­рыуы, һәр яҡлап өлгө күрһәтеп йәшәргә тырышыуы; балаларын Ислам ҡанундары нигеҙендә тәр­биә­ләргә тырышҡан ата-әсәнең кү­бәйеүе; мәктәптәрҙә дин дәрес­тәре уҡытылыуы – ошо һәм башҡа күркәм күренештәр төбә­гебеҙҙәге мосолман өммәтенең яҡтылыҡҡа ынтылышы сағы­лышы. Дәүләтебеҙ ҙә, рухи ҡим­мәтебеҙҙең йәшәйеш­тәге оло әһәмиәтен баһалап, дини ойошмалар, конфессиялар эшмә­кәр­легенә һәр яҡлап булышлыҡ ҡыла, халыҡ­тың күңел ихтыяждарын ҡәнәғәт­ләндереү йәһәтенән даими эш алып бара.
Ҡорбан – Раббыбыҙ тарафынан бирелгән ниғмәттәргә рәх­мәтле булыу, йомартлыҡ, шәф­ҡәтлелек, бер­ҙәмлек байрамы. Баш ҡалабыҙҙа ғәйет уңайынан мал салыуҙың быйыл бер майҙансыҡта уҙғарылыуын да дини остаздарыбыҙ мосолман­дарҙың нығыраҡ ойошоуы, уртаҡ маҡсатта яҡынайыуы билдәһе тип баһаланы. “Ҡорбанға тәғә­йенләнгән һарыҡ­тарҙың күп өлөшө үҙебеҙҙең йүнсел­дәрҙеке булыуы ла һөйө­нөслө, – тине улар. – Был күренеш – өммәт менән дәүләттең дөйөм хеҙмәт емеше. Республикала ғәйет мәлендә бер нисә иман йорто асылды, байрам алдынан күп мәсеттәр яңыртылды, биләмә­ләрендә өмә яһалды. Ихлас күңелдән башҡарыл­ған был эштәр – халҡыбыҙҙың үҙ асылына ҡайтырға, татыулыҡта, дуҫлыҡта, именлектә йәшәргә, мәңгелек ҡиммәттәрҙе дауам итергә ынтылыуына дәлил”.
Ҡорбан байрамы өс көн бара. Ошо мәлдә мосолмандар бер ҡорға йыйылып, ғәйеттә башҡа­рылырға тейешле изге ғәмәл­дәрҙе атҡара, дини мәжлестәр үткәрә, туғанда­рының, яҡында­рының хәлен белә, бүләктәр өләшә. Кисәнән алып республи­ка­быҙҙың барлыҡ мәсет­тәре, уларҙың янындағы биләмәләр гөрләп тора. Өлкәндәр фарыз ғибәҙәттәрҙе атҡар­һа, балалар уйнап кинәнә, төрлө ярыштарҙа ҡатнаша. Баш ҡалабыҙ Өфөлә иһә кисә, мәсеттәрҙә байрам саралары тамамланғас, халыҡ “Ватан” этноауылы янындағы биләмәлә үткә­релгән “Ҡорбан Хәләл Fest” фести­валенә йыйылды. Кискә ҡәҙәр барған байрамда көрәш, волейбол, регби, пейнтбол ярыштары үткә­релде, уҡ атыусылар мәр­гәнлектә көс һынаны. Фести­валгә килгәндәргә шулай уҡ сағыу концерт, тәмле былау тәҡдим ителде.