Ҡамыры мамыҡ һымаҡ йомшаҡ килеп сыға

Эслегенә нимә һалһағыҙ ҙа, отолмаҫһығыҙ.

Быйылғы йыл уңышы менән һөйөндөрҙө. Алмағастар алмаларына көсө етмәй һығылып тора. Тап алма бешкән саҡта күптәр унан алма бәлеше бешереп яҡындарын һыйлай. Баҡса алмаһынан бешерелгән пирог иҫ китмәле тәмле килеп сыға. Уңған хужабикәләребеҙҙең береһе рецебы менән уртаҡлашты.

– Бер стакан самаһы йылымыс һыуға бер балғалаҡ әсетке, бер балғалаҡ шәкәр, сама менән тоҙ һалам да 10 минут тирәһенә бутап ултыртып ҡуям. Бер аҙҙан ул әсеп ҡабарып сыға. Шуға ярты литр самаһы йылымыс һөт, бер йомортҡа, ярты стакан тирәһе көнбағыш майы, он ҡушып, йомшаҡ ҡына итеп баҫам һәм ҡабартырға ҡуям. Ҡамыр күтәрелһә, ҡул менән баҫып кире төшөрөп ҡуйырға ла мөмкин. Ҡабарғас, ҡамырҙы ике өлөшкә бүләбеҙ. Бер өлөшөн йәйеп өҫтөнә алма турап һалабыҙ һәм шәкәр һибәбеҙ. Ҡамырҙың икенсе өлөшө менән ҡаплап, духовкаға тығабыҙ. Сәй өсөн иҫ китмәле тәмле ризыҡ килеп сыға. Ышанмаһағыҙ, бешереп ҡарағыҙ.

Ә һеҙ нисек бешерәһегеҙ? Рецебығыҙ менән уртаҡлашһағыҙ ине.

Автор фотоһы.