Үрсетмәләр һуҙылып үҫеп китмәһен өсөн туҡландырырға кәрәк
Бик йәш үрсетмәләрҙе ашларға кәңәш ителмәй. Әммә бишенсе япрағы сыҡҡас, буйға һуҙылып үҫеп китмәһен, ныҡ, көслө булһын өсөн туҡландырырға мөмкин.
Көл төнәтмәһе – калий һәм фосфор сығанағы.
Бер стакан ағас көлөнә ике литр ҡайнар һыу ҡойоп, бер тәүлек төнәтергә. Шуны 10 литр булгансы һыу менән ҡушып болғатырға һәм һәр үҫенте төбөнә 100 миллилитр һибергә.
Файҙаһы: һабаҡтарҙы нығыта, тамыр системаһын яҡшырта, ауырыуҙарҙан һаҡлай.
Сүпрәле туҡландырыу – буйға һуҙылмайынса әүҙем үҫеш бирә. 10 литр йылы һыуға 10 грамм ҡоро сүпрә, әсетке + бер аш ҡалағы шәкәр ҡомо һалып, ике-өс сәғәт төнәтергә һәм һәр үҫенте төбөнә 50-100 грамм һибергә.
Файҙаһы: тамыр үҫешен дәртләндерә, үҫемлекте нығыта.
Йодлы ҡатнашма – фитофторозды киҫәтә. Өс литр һыуға өс тамсы йод ҡушып болғатырға. Үҫемлектәрҙе ике аҙнаға бер тапҡыр пульверизатор ярҙамында ҡойондорорға.
Файҙаһы: бәшмәк ауырыуҙарынан һаҡлай, үҫешен тиҙләтә.
Һуған ҡабығы төнәтмәһе – ҡоротҡостарҙан һаҡлай. Бер стакан һуған ҡабығына ике литр ҡайнар һыу ҡойорға һәм бер тәүлек төнәтергә. Үҫентеләрҙе 10 көнгә бер ҡойондорорға.
Файҙаһы: ҡоротҡостар барлыкка килеүҙе иҫкәртә, үҫемлектәрҙең иммунитетын нығыта.
Нашатырь спирты – үҫтереү өсөн азот. 10 литр һыуға бер аш ҡалағы ҡушып болғатырға һәм һәр үҫентенең тамыр төбөнә 50-100 миллилитр һибергә.
Файҙаһы: артыҡ оҙон булып буйға үҫеүгә юл ҡуймайынса үҫешен әүҙемләштерә, азотҡа туҡландыра.
Лилиә Нуретдинова фотоһы.