Орхидеяғыҙ сәскә атмаһа...
Уны һарымһаҡлы һыу менән туҡландырырға була.
Күптәрҙең тәҙрә төптәрендә орхидея сәскә атып хужабикәләрҙе ҡыуандыра. Уның матурлығына һоҡланмаған кеше юҡтыр, етмәһә төрлө төҫтә булыуҙары менән дә күп сәскәләрҙән айырылып тора. Әммә, шуныһы күп осраҡта орхидея сәскәгә бөрөләнмәй. Гөл яратыусылар был осраҡта уға стресс эшләргә кәңәш итә. Тик был ысул ҡайһы осраҡта гөлдө бөтөнләй юҡҡа сығарыуы ла бар. Шуға күрә һеҙгә орхидеяғыҙҙы тәрбиәләү өсөн бер нисә кәңәш бирәбеҙ.
Орхидея сәскә атмаһа йәки "ауырыһа", бәшмәктәр барлыҡҡа килһә, гәрәбә кислотаһы менән һарымһаҡтан төнәтмә яһап һибергә кәрәк.
Уны әҙерләү өсөн бер төймә гәрәбә кислотаһын бер литр ҡайнар һыуҙа эретергә. Һыу һыуынғас, шуға бер теш һарымһаҡ иҙеп һалырға кәрәк. Бер тәүлек төнәткәс, һибә алаһығыҙ. Был төнәтмәне айына бер ҡулланырға кәрәк. Сәскә атҡан йәки бөрөләнгән ваҡытта һибергә ярамай.
Төнәтмәне өс көн һаҡларға була. Оҙаҡ торһа, файҙаһы ҡалмай. Ул вирустар, ауырыуҙар, ҡоротҡостарға ҡаршы тороп ҡына ҡалмай, орхидеяның иммунитетын да нығыта. Күсереп ултыртҡанда тиҙ тырнаҡланып китһен өсөн дә ошо төнәтмәне һибегеҙ.
Профилактика өсөн бер теш һарымһаҡты төбөнә ҡуйып ҡалдырһағыҙ ҙа була.
Фото: irkutskflowers.ru