Уңышты үҫтереп алыу ғына түгел, уны һаҡлау ҙа бик мөһим. Әле уйланырға, төрлө план ҡорорға ваҡыт барлығын иҫәпкә алып, тәжрибәм менән уртаҡлашырға булдым. Һүҙем — мөгәрәп хаҡында.
Тәҡдим ителгән өлгө ҡайһы яғы менән отошло һуң? Берҙән, ул ҡыҙыл кирбестән генә яһала. Тимәк, ағас ҡулланылмай. Икенсенән, сысҡан үтеп инмәй. Шулай уҡ, ағас ҡулланылмағас, төрлө сереткес ауырыуҙар ҙа булмай.
Мөгәрәптең ҙурлығына килгәндә, оҙонлоғо — 3,2, киңлеге — 2,4, тәрәнлеге — 2,2 метр. Ике яҡ стена ике рәт кирбестән 1 метр бейеклектә һалына. Унан түбәнең аркаһын теҙә башлайһың. Формаһын 180 градуслы транспортир һымаҡ яһарға кәрәк. Уны ике торбанан бөгөп, араһын 60 сантиметрлыҡ ҡалай менән тоташтыралар. Был бер юлы ике рәт кирбес теҙергә мөмкинлек бирәсәк. Кирбестәрҙе теҙгәс, опалубканы (арка формаһын) биш-алты сәғәттән һуң ғына күсерәләр. Стена менән ер араһына балсыҡ тултыралар, ныҡлап төйәләр. Елләтеү өсөн арканың ике яғында ла тишектәр ҡалдырҙым. Сысҡандар үтеп инмәһен тип стенаның аҫ яғын иҙәндән 120 мм-ға тәрәнерәк иттем. Диуарҙы күтәреү өсөн цемент, ҡом һәм балсыҡтан (1:2:1 иҫәбенән) иҙмә эшләнем. Ә аркаға ул бармай — 2:1:1 иҫәбенән яһала.
Барлыҡ эште тамамлап, мөгәрәптең ситенән ишеккә урын ҡалдырғас, уны бер аҙна киптерҙем. Һуңынан өҫтөнә бер метр ҡалынлыҡта еңел тупраҡ (әҙер тиреҫ) өйҙөм. Мөгәрәп уңайлы ла, матур ҙа килеп сыҡты. Уны биш йыл ҡулланабыҙ, дым тартманы, стеналары күгәрмәне.