Башҡортостандан күп балалы атай МХО-нан ялға ҡайтҡан
Башҡортостандан МХО яугире, күп балалы атай ҡыҫҡа ваҡытлы ялға ҡайтҡан. Балтас районынан «Юлай» позывнойлы яҡташыбыҙ 2024 йылдың октябренән алғы һыҙыҡта, танк полкының разведка ротаһы составында хеҙмәт итә. Был хаҡта муниципалитет хакимиәте башлығы Илгиз Субушев социаль селтәрҙәге сәхифәһендә яҙа.
«Юлай» Борай районының Яңы Таҙлар ауылында тыуып үҫкән. 2012 йылда кәләш алған һәм ғаиләһе менән Балтас районының Ҡомъяҙы ауылына күсенгән. Оборона министрлығы менән контракт төҙөгәнсе вахта ысулы менән Себерҙә эшләгән.
Яугирҙе өйҙә ҡатыны Эльвина, өс улы һәм ике ҡыҙы көтә.
«Улы Юнир 7-се класҡа бара, волейбол менә шөғөлләнә, ярыштарҙа әүҙем ҡатнаша, Юлиә – уҡыу алдынғыһы, 5-се класҡа күсте, йәш шайморатовсы антын ятлай, Әлиә бейергә ярата. Айсаф һәм иң кесе улы Юлай балалар баҡсаһына йөрөй», – тип яҙа Илгиз Субушев социаль селтәрҙә.
Хәтерегеҙгә төшөрәбеҙ, Башҡортостанда махсус хәрби операцияла ҡатнашыусыларға һәм уларҙың ғаилә ағзаларына 40-тан ашыу ярҙам сараһы ғәмәлдә. Оборона министрлығы менән килешеү төҙөгән өсөн бер юлы 1 700 000 һум түләнә, айлыҡ эш хаҡы 210 мең һумдан башлана. Тулыраҡ башбат.рф сайтында.