МХО яугиры Баймаҡ уҡыусыһына алғы һыҙыҡтан бүләк ебәргән

«Хан» позывнойлы МХО яугиры Баймаҡ районынан мәктәп уҡыусыһына көтөлмәгән бүләк ебәргән. Был хаҡта район хакимиәте хәбәр итә.

Күсей ауылынан 6-сы класс уҡыусыһы Асия Игебаева МХО зонаһында хеҙмәт итеүсе яҡташтарына хат яҙған. Мәктәп уҡыусыһының хаты «Хан» позывнойлы һалдаттың ҡулына барып эләгә. Алтынсы класс уҡыусыһының ихлас теләктәшлек һүҙҙәре хәрби кешегә бик ныҡ тәьҫир итә һәм ул ҡыҙға рәхмәт билдәһе итеп бүләк ебәрергә ҡарар ҡыла.

– Был ваҡиға беҙҙең һалдаттар өсөн ярҙамдың ни тиклем мөһим булыуын тағы бер тапҡыр раҫланы. Берҙәмлек, халыҡ ярҙамы тойғоһо яугирҙар өсөн көслө этәргес булып тора, – тип хәбәр иттеләр Баймаҡ районы хакимиәтенән.

Хакимиәттә шулай уҡ гуманитар ярҙам йыйыуҙы дауам итеүҙәре хаҡында иҫкәрттеләр. Посылкалар М.Шайморатов исемендәге штабта ҡабул ителә, ул киләһе адрес буйынса урынлашҡан: Баймаҡ ҡалаһы, Әлибаев урамы, 53-сө йорт.