Башҡортостанда МХО-ла ҡатнашыусыларға һәм уларҙың ғаилә ағзаларына ярҙам йылы логотибы менән таныштырҙылар
Башҡортостан вице-премьеры вазифаһын башҡарыусы – спорт министры Руслан Хәбибов үҙенең телеграм-каналында Махсус хәрби операцияла ҡатнашыусыларға һәм уларҙың ғаилә ағзаларына ярҙам йылы логотибын күрһәтте.
«Логотип республиканың яугирҙәрҙе һәм уларҙың ғаиләләре хаҡында онотмауы, хәстәрлек күреүе тураһында билдәле бер символ булырға тейеш», – тип билдәләне Руслан Хәбибов.
Хәтерегеҙгә төшөрәбеҙ, уҙған йылдың октябрендә «Ҡаршылыҡтарҙы емереп» форумы барышында Башҡортостан Башлығы Радий Хәбиров 2025 йылды МХО-ла ҡатнашыусылар һәм уларҙың ғаиләләре йылы тип иғлан итте.
– Бөгөн махсус хәрби операция шарттарында ҡаты яраланған яугирҙәргә ярҙам итергә кәрәк. Уларҙы тулы ҡанлы тормошҡа яраҡлаштырыу өсөн мөмкин булғандың барыһын да эшләү мөһим. Шуға күрә киләһе йылды Махсус хәрби операцияла ҡатнашыусылар һәм уларҙың ғаилә ағзалары йылы тип иғлан итәбеҙ, – тине Радий Хәбиров.
«Башинформ» хәбәр иткәнсә, Башҡортостанда йәшәүселәр Оборона министрлығы менән контракт төҙөү өсөн онлайн ғариза ҡалдырырға мөмкин.