Яҡташ яугиребеҙ иптәштәрен ВСУ дрондары һөжүменән ҡотҡарған
Себенле ауылынан «Шайтан» позывнойлы яҡташыбыҙ махсус хәрби операция биләмәһендә иптәштәрен ҡотҡарған. Был хаҡта Әлшәй районы хакимиәте башлығы Наил Әбелғужин хәбәр итә.
Яугир штурм төркөмө менән ҡатмарлы хәрби бурысты үтәргә юлланған. Һуғышсыларға ВСУ-ның терәк пунктын баҫып алырға тигән бойороҡ бирелгән. Сигенергә теләмәгән дошман беҙҙекеләргә дрондар менән һөжүм иткән. Ҡыҙғанысҡа ҡаршы, штурмовиктарҙың бер нисәһе төрлө дәрәжәләге йәрәхәттәр алған.
«Шайтан» яралыларға медицина ярҙамы күрһәткән, иң мөһиме, ялан шарттарында дүрт иптәшенең ҡан ағыуын туҡтатҡан. Әлшәй егете яңғыҙы өс иптәшен, ә эвакуация төркөмө ярҙамында тағы алты кешене хәүефһеҙ урынға илткән.
«Рядовойҙың ҡыйыу аҙымы бурысты аҙ юғалтыуҙар менән үтәргә, ә уның тактик медициналағы белеме байтаҡ ғүмерҙәрҙе һаҡлап ҡалырға мөмкинлек биргән», — тип яҙҙы Наил Әбелғужин социаль селтәрҙә.
«Шайтан» өлөшләтә мобилизация буйынса махсус операция биләмәһенә саҡырылған, һуңынан хеҙмәт итеү өсөн контракт төҙөгән. Яңыраҡ уның әсәһе хәрби часть командирынан рәхмәт хаты алып ҡыуанған.
«Хәрби бурыстарын намыҫлы үтәгән яҡташтарыбыҙ менән сикһеҙ ғорурланам. Яугирҙәрҙең барыһына ла сәләмәтлек, түҙемлек һәм көслө рух теләйем. Һеҙҙең иҫән-һау әйләнеп ҡайтыуығыҙҙы көтәбеҙ», — тип билдәләне Наил Әбелғужин.