Өфө шашкасыһы Александр Георгиев — донъя чемпионы

12 сентябрҙә Мәскәү өлкәһендә шашка-64 буйынса донъя чемпионаты үтте. Башҡортостан исеменән Муродулло Амриллаев һәм Александр Георгиев сығыш яһаны.

Өфөнән халыҡ-ара шашка буйынса 10 тапҡыр донъя чемпионы Александр Георгиев беренсе тапҡыр рус шашкаһында классик программала еңеү яуланы, тип хәбәр иттеләр «Башинформ»ға Башҡортостандың үҙәк шашка клубынан.

Александр Георгиевтың еңеүе тарихи мәл булды. Өфө шашкасыһы тарихта дүрт шашка системаһы: халыҡ-ара, бразил, рус һәм фриз шашкалары буйынса донъя чемпионатында берҙән-бер еңеүсе исемен яуланы. Георгиев –  рус шашкаһында классик программаның иң өлкән еңеүсеһе (51 йәш). 64 шаҡмаҡлы шашка уйындарында донъя кимәлендә еңеүгә юл оҙон булды. 2011 йылда Өфө гроссмейстеры — өсөнсө, 2016 һәм 2020 йылдарҙа — икенсе. Бынан тыш, спортсы халыҡ-ара һәм рус шашкаһында донъя титулын яуланы (25 августа Ташкентта команда чемпионатында Рәсәйҙең йыйылма командаһы составында өс алтын миҙал алды).