Республиканың йәш көрәшселәре Рәсәй беренселегендә өс миҙалға лайыҡ булды
Иваново ҡалаһында ҡатын-ҡыҙҙар көрәше буйынса Рәсәй беренселеге тамамланды. Башҡортостан спортсылары 16 йәшкә тиклемге ҡыҙҙар араһында турнир йомғаҡтары буйынса өс миҙал яуланы, тип хәбәр итә республиканың Йәштәр сәйәсәте һәм спорт министрлығы.
Айсель Кәримова 33 килограмға тиклем ауырлыҡ категорияһында чемпион булды. Ул Мәскәү өлкәһенән һәм Йәһүд автономиялы өлкәһенән килгән дәғүәселәрен еңде, ә финалда Башҡортостандан Вәлиә Мөхәмәтшина менән осрашты. Спортсылар беренсе һәм икенсе урындарҙы бүлеште. Амира Йосопова 36 килограмға тиклемге категорияла бронза миҙал яуланы. Финалда ул Тверь өлкәһенән Елизавета Инкинаны 6:2 иҫәбе менән еңде.