Башҡортостанда «Ҡала тренеры» программаһында ҡатнашыусыларға 1 миллион һум түләнә
Башҡортостанда «Ҡала тренеры» программаһына ғаризалар ҡабул ителә башланы. Республика хөкүмәте премьер-министры урынбаҫары — спорт министры Руслан Хәбибов үҙенең телеграм-каналында ошо турала хәбәр итте.
Вице-премьер һүҙҙәренсә, һайлап алыуҙы үткән һәр ҡатнашыусыға 1 миллион һум күләмендә аҡсалата сертификат тапшырыла.
«Аҡсаны торлаҡ (йорт йәки фатир), өй һалыу өсөн ер участкаһы һатып алыу, ипотеканы ҡаплау, шәхси йорт төҙөү өсөн тотонорға мөмкин», — тип билдәләне Руслан Хәбибов.
Ғаризаларҙы спорт өлкәһендә дәүләт көйләүе идаралығында тапшырырға мөмкин (Өфө ҡалаһы, Совет урамы, 18-се йорт, 4-се бүлмә). Талап ителгән документтар исемлеге ведомство сайтында баҫылған.
Бынан алдараҡ «Башинформ» республикала спортты үҫтереү стратегияһына үҙгәрештәр индерелеүе хаҡында хәбәр иткәйне.