Башҡортостан шашкасылары Рәсәй чемпионатында дүрт миҙал яуланы
Башҡортостан шашкасылары халыҡ-ара шашка буйынса Рәсәйҙең команда чемпионатында дүрт миҙал яуланы. Республиканың спорт министрлығынан хәбәр итеүҙәренсә, ярыштар Мәскәү өлкәһендә үтте.
Республиканың ҡатын-ҡыҙҙар йыйылма командаһы ике алтын миҙал алды. Команда составында Айгөл Иҙрисова, Кристина Осипова һәм Агата Парахина сығыш яһаны.
Ир-егеттәр командаһы ла алтын һәм көмөш миҙал яулап, яҡшы һөҙөмтәләр күрһәтте. Уның составында: Александр Георгиев, Муродулло Амриллаев, Айнур Шәйбәков, Марсель Шәрәфетдинов һәм Владимир Мильшин.
Чемпионат йомғаҡтары буйынса донъя команда чемпионатына милли йыйылма составы билдәләнде. Ул 2025 йылдың 1-6 майында Үзбәкстандың баш ҡалаһы Ташкентта ойошторола.
2021 йылдан алып тәүге тапҡыр беҙҙең йыйылма команда рәсми рәүештә халыҡ-ара шашка буйынса донъя чемпионатында сығыш яһай. Рәсәйҙең Шашка федерацияһы президиумы 2024 йылда бер тауыштан Халыҡ-ара шашка ассоциацияһы менән эшләү һәм Бөтә донъя шашка федерацияһы менән хеҙмәттәшлекте туҡтатыу өсөн тауыш бирҙе.
