Башҡортостан акробаттары Орел ҡалаһында Рәсәй беренселегендә еңеүсе булды
Башҡортостандың йәш спортсылары спорт акробатикаһы буйынса Рәсәй беренселегендә иң яҡшылары тип танылды. Орел ҡалаһында үткән турнирҙа илдең 34 төбәгенән 11-16 йәшлек 300-ҙән ашыу спортсы ҡатнашты.
Октябрьский хакимиәте башлығы Алексей Пальчинский хәбәр итеүенсә, Дина Низаева менән Тихон Брезгин ҡатнаш дисциплинала пьедесталдың юғары баҫҡысына күтәрелде. Төркөмдәр программаһында Маргарита Садовникова, Камилла Кириллова, Анастасия Иванова икенсе булды.
Спортсылар менән Олеся Муллағәлиева, Владислав Куприянов, Фирүзә Вәлиева, Сабина Вәлиуллина һәм Валерия Мензорова шөғөлләнә.
Хәтерегеҙгә төшөрәбеҙ, Октябрьский ҡалаһы Башҡортостанда спорт акробатикаһы буйынса төп үҙәктәрҙең береһе булып тора. Ҡала спорт акробатикаһы федерацияһының башҡарма директоры Александр Дергуновтың әүҙем эшләүе һөҙөмтәһендә Октябрьскийҙа Бөтә Рәсәй һәм халыҡ-ара ярыштар ойошторола башланы.