Өфө уҡыусыһы – классик шахмат буйынса Рәсәй чемпионы
Өфөнән республика инженер лицей-интернаты уҡыусыһы Морат Бастанов классик шахмат буйынса Рәсәй чемпионы исемен яуланы. Был хаҡта Орджоникидзе районы хакимиәтенән хәбәр иттеләр.
Морат Бастанов мөмкин булған 9 мәрәйҙең етәүһен йыйып, 17 йәшкә тиклемге егеттәр араһында беренсе урынды алды. Еңеү уға лайыҡлы награда ғына түгел, халыҡ-ара рейтингтың артыуына килтерҙе (+52 пункт).
«Морат шахмат менән өс йыл элек шөғөлләнә башланы. Йәш шахматсы 100-ҙән ашыу рейтинг турнирында ҡатнашып, спорт мастерлығына кандидат исемен алды. Уның уңыш сере – ныҡышмалылыҡ, тырышлыҡ, командалыҡ рухы», – тип хәбәр итә муниципалитет хакимиәте.
Классик шахмат буйынса Рәсәй чемпионаты финалы Сочиҙа уҙҙы. Унда 1000-дән ашыу шахматсы ҡатнашты. Турнир 9 турҙа үтте.
Бынан алдараҡ «Башинформ» Башҡортостан спортсыларының ҡышҡы Сурдлимпия уйындарында 2 көмөш миҙал яулауы тураһында хәбәр иткәйне.
