Сучковтың голы «Салауат Юлаев»ҡа «Автомобилист» менән уйында еңеү килтерҙе

«Салауат Юлаев» плей-офф серияһының тәүге уйынындағы еңелеүе өсөн «Автомобилист»тан реванш алды. Екатеринбургтағы икенсе уйын 1:0 иҫәбе менән тамамланды.

Өфө командаһы тәүҙән үк әүҙем һөжүм итте. Уҙған уйында сосораҡ булған хужалар был юлы юлаевсылар артынан өлгөрә алманы. Ҡаты һәм «бысраҡ» уйын менән ҡунаҡтарҙы туҡтатырға маташты. Матч башында уҡ Александр Шаров Девин Броссоны бортҡа башы менән бәрҙерҙе, һөҙөмтәлә юлаевсы көскә аяҡҡа баҫты һәм боҙҙан сығырға мәжбүр булды. Судьялар бары тик уйынды туҡтатыуҙан башҡа сара күрмәне. Бәхеткә күрә, юлаевсыларҙың 57-се һанлы уйынсыһы оҙаҡламай боҙға кире сыҡты.

18-се минутта «Салауат Юлаев» күпселек арҡаһында иҫәпте асты. Шелдон Ремпал үҙенең етеҙ пасы менән Егор Сучковты алға сығарҙы. Ул һул флангтан ҡапҡаға яҡынлап, көслө итеп шайбаны ҡапҡаға ырғытты. Был уйындағы «Салауат Юлаев»ҡа еңеү алып килгән берҙән-бер гол булып сыҡты. Тәнәфес ваҡытында Сучков үҙ голының серен асты.

«Беҙҙең команда үҙенең етеҙ уйыны менән «Автомобилист»тан көслөрәк. Был юлы беҙ уның менән файҙалана алдыҡ. Хәҙер инде, һис шикһеҙ, еңеү беҙҙең яҡта буласаҡ. Тәүге биш минут көсөргәнешле булды, бер кем дә ҡапҡаһына шайбаны индерергә теләмәне. Башта ябайыраҡ, тыныс уйнарға тырышабыҙ, иң мөһиме, хат ебәрмәҫкә. Сөнки плей-офф уйындарында хата хаҡы күпкә ҡиммәткә төшәсәк», — тине Егор Сучков.