Башҡортостандан МХО ветерандары «Ватанды һаҡлаусылар кубогы»нда алтын яуланы

Республикабыҙҙан өс МХО ветераны Дзержинскиҙа өҫтәл теннисы буйынса ярышта еңеүсе булды.

«Ватанды һаҡлаусылар кубогы» төбәк-ара ярыштарында еңеүселәрҙе бүләкләү тантанаһы Түбәнге Новгород өлкәһенең Дзержинск ҡалаһында үтте. Турнирҙа Волга буйы федераль округының 14 төбәгенән 130-ға яҡын МХО ветераны ҡатнашты.

«Ватанды һаҡлаусылар» фонды филиалының матбуғат хеҙмәтенән хәбәр итеүҙәренсә, Башҡортостан командаһы Кубокта уңышлы сығыш яһаны. Яугирҙәр өҫтәл теннисы буйынса өс алтын миҙал яуланы. Өфөнән Дмитрий Феликсов, Стәрлетамаҡтан Владимир Егоров һәм Шишмә районынан Рауил Шәңгәрәев чемпион исеменә лайыҡ булды. Бынан тыш, ветерандар командаһы ултырып волейбол уйнау буйынса ярышта көмөш миҙал алды.

Ярышта еңеүем көтөлмәгән хәл булды, тип шатлығын йәшермәй Владимир Егоров.

«Шатлыҡ һәм ғорурлыҡ тойғоһо кисерәм. Әлеге ваҡытта мин Стәрлетамаҡ ҡалаһы буйынса МХО ветерандары ассоциацияһы рәйестәше булып торам. «Ватанды һаҡлаусылар» фондына ошондай сараларҙа ҡатнашыу мөмкинлеге өсөн рәхмәт белдерәм, ярыш ваҡытында янда булған һәм ярҙам иткән тренерҙарға, егеттәргә рәхмәт», — тип тәьҫораттары менән уртаҡлашты Владимир.

«Ватанды һаҡлаусылар» фондының республика филиалы етәксеһе Гөлнур Ҡолһарина һүҙҙәренсә, сараның йомғаҡтары буйынса филиалда яңы эш йүнәлештәре индерелә.

Команданың остазы һәм кураторы булып дүрт тапҡыр Паралимпия уйындары чемпионы, Рәсәй Паралимпия комитеты президенты кәңәшсеһе Ирек Зарипов сығыш яһаны.

https://www.bashinform.ru/news/svo/2025-08-22/veterany-svo-iz-bashkirii-vzyali-zoloto-na-kubke-zaschitnikov-otechestva-4357880