Ҡазанда XXVII Бөтә донъя йәйге универсиадаһы дауам итә. Шаршамбы еңел атлетика буйынса Рәсәй йыйылма командаһы составында Башҡортостандан бер генә вәкил сығыш яһаны – 5000 метр арала яҡташыбыҙ Андрей Сафронов ҡатнашты. Спорттың был төрө буйынса финал бөгөн буласаҡ.

Ҡатын-ҡыҙ волейболсыларыбыҙ АҠШ командаһы менән осрашты. Рәсәй составында Өфө дәүләт нефть-техник университетының "Уфимочка"һынан Анна Малова һәм ошо уҡ команданың экс-уйынсыһы, әлеге ваҡытта Стәрлетамаҡ физик культура институтында белем алған Анастасия Шляховая ла бар.
Хәтерегеҙгә төшөрәбеҙ: әлегәсә Рәсәй йыйылма командаһының етди дәғүәселәре булманы – чехтар һәм поляктар 3:0 иҫәбе менән еңелде.