Билдәле булыуынса, 2013 йылда Өфөлә йәштәр командалары араһында хоккей буйынса донъя чемпионаты үтәсәк. Башҡортостан Президенты Рөстәм Хәмитов етәкселегендә ойоштороу комитетының сираттағы кәңәшмәһендә байтаҡ мәсьәләләр ҡаралды.
Сараға әҙерлектең кимәле тағы бер тапҡыр тикшерелде. Турнир “Өфө-Арена” менән Спорт һарайында үтәсәк. Әгәр беренсеһенә дәғүәләр булмаһа, үткән быуаттың 60-сы йылдарында төҙөлгән боҙ һарайы халыҡ-ара талаптарға яуап бирмәй тиерлек. Уны реконструкциялау мәсьәләһен республика башлығы тиҙ арала хәл итергә ҡушты.
Турнир ваҡытында Өфөгә киләсәк ҡунаҡтарҙы урынлаштырыу өсөн ҡунаҡхана мәсьәләһе лә киҫкен тора. Беҙгә миллион ярым көйәрмәндең килеүе көтөлә. Президент фекеренсә, уларға халыҡ-ара кимәлдәге шарттар тыуҙырыу зарур.
Шулай уҡ турнирҙың мәҙәни программаһы буйынса ла байтаҡ эш талап ителә. Уларға чемпионатты асыу һәм ябыу тантаналары, баш ҡала ҡунаҡтарының һәм хоккейсыларҙың ялын ойоштороу, Яңы йыл байрамы мәлендә уларҙың хәүефһеҙлеген тәьмин итеү инә.
Бөгөнгә хоккей буйынса донъя беренселегенең логотибы раҫланған, ә талисман һаман табылмаған әле. Дәғүәселәр араһында хоккейсы бөрйән айыуы, ҡуян, бүре, хатта бал ҡорто ла бар. Шулай уҡ кәңәшмәлә ҡатнашыусылар Өфө ҡалаһын презентациялауҙы ла камиллаштырыу кәрәк тигән фекерҙә. Был презентация менән республикабыҙ делегацияһы һәм Рәсәйҙең Хоккей федерацияһы вәкилдәре 2012 йылдың 4 ғинуарында Канаданың Калгари ҡалаһында сығыш яһаясаҡ.