Юғары хоккей лигаһының плей-офф уйындарында ҡатнашҡан Нефтекаманың “Торос” командаһы 7 апрелдә Воронежда урындағы “Буран” менән дүртенсе уйынын үткәрҙе.

Быға тиклем сериялағы иҫәп өс уйындан һуң беҙҙең егеттәр файҙаһына 3:0 ине. Алыш көсөргәнешле барҙы. Беренсе осорҙоң һуңғы минутында 1:1 булып тигеҙләнгән иҫәп оҙаҡ үҙгәрмәне. Уйын тамамланыуға 44 секунд ҡалғанда “Торос”тың иң оҫта һөжүмселәренең береһе Егор Дубровский хәл иткес голды индерҙе. Хужалар, ҡалған ваҡытта нисек кенә тырышһалар ҙа, бер нәмә лә эшләй алманы.
Шулай итеп, “Торос”, серияла дүрт еңеүгә өлгәшеп, беренсе булып финалға сыҡты. Унда кем менән уйнаясағы Ҡаҙағстандың “Һары арҡа” менән Волжск ҡалаһының “Ариада-Акпарс” командалары араһындағы ярымфинал уйындарында еңеүсе асыҡланғас билдәләнәсәк. Әлегә иҫәп “Һары арҡа” файҙаһына – 3:1. Командалар бөгөн Караганда ҡалаһында бишенсе уйын үткәрә.