Плей-офтың хәл иткес уйындарында "Аҡ барыҫ"тан рәттән өс тапҡыр еңелеүебеҙҙе берәү ҙә көтмәгәндер. Әммә Ҡазанда үткән көсөргәнешле осрашыуҙа бер мәрәйгә отолоп, "Cалауат Юлаев" үҙен упҡын ситенә килтереп терәгәйне.

Шуға ла "Өфө-Арена"лағы матчҡа бөтәһе лә "һуңғы уйын булмағайы" тигән хәүефле уй менән килде. "Аҡ барыҫ" уйынсылары ла бындай мөмкинлектең башҡаса булмаясағына төшөнә ине буғай. Көрәш дауам итһен өсөн юлаевсыларҙан бары еңеү талап ителде. Быны көйәрмәндәр ҙә аңланы: боҙ майҙанын уратып алған "йәшел диңгеҙ" тыуҙырған шау-шыу финал уйындарын хәтерләтте.
Ә уйын барышы көйәрмәндәрҙе бер эҫегә, бер һалҡынға ташланы тиһәк, хата булмаҫ. "Салауат" көсөргәнешле көрәштә ике шайбаға алға сыҡты, әммә артабанғы ике хатаһы "Аҡ барыҫ"ҡа иҫәпте тигеҙләргә ярҙам итте. Өсөнсө осорҙа Александр Степанов юлаевсыларҙы тағы алға сығарҙы, әммә уйын тамамланыуға биш минут ҡалғас, тегеләр йәнә бер шайба сәпәне. "Өфө-Арена"ны хәл иткес овертайм көтә ине.
Өҫтәмә ваҡытта бер команда ла хаталанырға теләмәне. Осрашыу хоккейсыларыбыҙҙың ихтыяр көсө өсөн ысын һынауға әүерелде. Үтә лә һаҡ уйнанылар, әммә икенсе овертайм аҙағында ҡунаҡтар барыбер яңылышты, ошоно ғына көткәндәй, һаҡсы Брент Сопел Барулиндың ҡапҡаһына шайба сойорғотто!
Бөгөн ике команданы ла хәл иткес етенсе уйын көтә. Өфөләге осрашыу беҙҙекеләрҙең етешһеҙлектәрен тағы бер ҡабат асыҡ күрһәтте. Әгәр тренер штабы һәм уйынсылар шуларҙан арына алһа, еңеүгә өмөт бар. Ә туҡтауһыҙ яңылышыуҙы "Аҡ барыҫ" ғәфү итмәйәсәк. Шулай ҙа уйынсыларыбыҙ дөрөҫ һығымта яһар һәм хәл иткес алышта һынатмаҫ тип ышанайыҡ.