Тренер өсөн үҙеңдең тәрбиәләнеүсеңдең уңышын күреүҙән дә ҙурыраҡ ҡыуаныс бармы икән? Тимәк, хеҙмәтең бушҡа китмәгән, юлыңды дауам итерҙәй алмашсы үҫә.

Польшала боҙҙа мотоциклда уҙышыу буйынса командалар араһындағы донъя чемпионатында яҡташыбыҙ Николай Красников – унынсы, ә уның уҡыусыһы Дмитрий Колтаков тәүге алтын миҙалын яуланы. Команда составындағы Данил Иванов та (Тольятти,“Мега-Лада”) был еңеүгә тос өлөш индерҙе.
Санок ҡалаһындағы стадион шығырым тулы. Турнирҙың тәүге уҙыштарынан уҡ алтын миҙал өсөн Рәсәй менән Австрия командалары көрәшәсәге билдәле булды. Беренсе көндә Австрия егеттәре беҙҙекеләрҙе ике мәрәйгә артта ҡалдырһа ла, иртәгәһенә уларҙы өҫтәмә әйләнештә барыбер уҙып, алтынды яулауға өлгәштеләр.
Рәсәй йыйылма командаһы ун ике әйләнештең унауһында еңде, икәүһендә иҫәп тигеҙ булды. Красников менән Колтаков өс тапҡыр стартҡа сыҡты, һәм барыһы ла улар файҙаһына 6:5 иҫәбе менән тамамланды. Йәнә алты осрашыу шундай уҡ һөҙөмтә менән бөттө, ә йомғаҡлау уҙышында беҙҙекеләр Австрия егеттәрен 4:2 иҫәбе менән ҡыйратты.
Икенсе урынды – Австрия, өсөнсө урынды Швеция йыйылма командаһы яуланы.