Үҙеңдең генә түгел, командалаштарыңдың да мөмкинлектәрен дөрөҫ тойомлауҙы, майҙанды тотош күрә белеүҙе, киләһе секундта ҡайһы уйынсының ниндәй урында булырын яҡынса тоҫмаллай алыуҙы талап иткән юғары интеллектуаль уйын тип һанайҙар волейболды.

Республиканың әле был, әле теге төбәгендә волейбол ярыштары үтеүе – матур күренеш. Улар күберәк ҡалаларҙа, район үҙәктәрендә уҙғарыла. Ә бына яңыраҡ бер ауылда спорттың ошо төрө буйынса алты команда көс һынашты тиһәм, ни әйтерһегеҙ?
Хәйбулла районының Ивановка ауылында үтте был ярыш. «Биш быуын турниры» тип аталды ул. Күсмә кубогы булған турнир, әйткәндәй, икенсе тапҡыр уҙғарыла. Тәүгеһенән һуң «был ярышты йыл һайын уҙғарырға кәрәк» тиһәләр ҙә, былтыр мәктәптә, шул иҫәптән спорт залында ла барған капиталь ремонт мәшәҡәтләне. Уның ҡарауы, быйылғыһы күҙгә күренеп матурайған спорт залында булды.
Көсөргәнешле ярышта бөгөн ауылда төпләнеп йәшәп ятҡан яңы быуын вәкилдәренең «Йәштәр» командаһы еңеүе төбәктә волейболды ни тиклем үҙ итеүҙәрен тағы бер тапҡыр раҫланы ғына. Икенсе урынға лайыҡ булған Торомтаевтарҙың «Утарбай» командаһы ла ауылдағыларҙың был уйын төрөнә нәҫеле-нәсәбе менән бирелгәнлеген күрһәтте. Өсөнсө урынға сыҡҡан «Ҡорҙаштар» мәктәп йылдарындағы бер команда булып уйнау күнекмәләрен иҫенә төшөрҙө. Эйе, ҡасандыр үҫмер саҡта оҫталыҡҡа, таһыллыҡҡа ынтылып яһаған тәүге аҙымдар йылдар үткәс тә һис онотолмай, ә, киреһенсә, үҙенә гел ылыҡтыра, тарталыр ул. Әлеге көндә мәктәптә һәм төрлө вуздарҙа уҡып йөрөгән «Уҡыусылар», «Студенттар», иң өлкәненә 62 йәш булған «Ветерандар» командалары ла еңел генә бирелмәне. Һәр береһе еңеүсеһенән бер нисә генә мәрәйгә ҡалышты.
Был матур сара ошо ауыл егете, Башҡортостан радиоһының «Юлдаш» мәғлүмәт һәм йыр-моң каналы хеҙмәткәре Закир Шәриповтың башланғысы менән, алда әйткәнемсә, элгәрге йылдың ғинуар каникулынан алып, ошо мәктәптең физкультура уҡытыусыһы Факил Сәхиулла улы Торомтаевҡа хөрмәт йөҙөнән ойошторола. Изге ниәтте «Юлдаш», «Спутник FM» радио каналдары, «Берҙәм Рәсәй» партияһы бүлексәһе, урындағы ДОСААФ ойошмаһы, ауыл биләмәһе етәкселеге, ауылдаштары ла хуплай.
Яңы йыл байрамдарында, күнегелә барған һыйлы табындарҙы ҡалдырып, тотош бер көндө ивановкалар спорт залында үткәрҙе, ете ҡат тирҙәре сыҡҡансы туп уйнаны. Тимәк, халыҡҡа сәләмәтлеген нығытыу, күңелле аралашыу мөмкинлеге тыуҙы.