Спорт яратыусылар түҙемһеҙләнеп көткән минуттар һуҡты: Өфөлә йәштәр командалары араһында донъя чемпионаты башланды.

“Өфө-Арена” боҙ һарайында форумда ҡатнашыусыларҙы Башҡортостан Хөкүмәте Премьер-министры урынбаҫары Марат Мәһәҙиев, Рәсәй Хоккей федерацияһы президенты Владислав Третьяк, Халыҡ-ара хоккей федерацияһы советы ағзаһы Франк Гонсалес, Рәсәйҙең спорт, туризм һәм йәштәр сәйәсәте министры урынбаҫары Юрий Нагорных сәләмләне, уңыштар теләне.
Чемпионатта иң беренсе булып Спорт һарайында Латвия менән Финляндия егеттәре осрашты. Көйәрмәндәргә тәүге мәрәйҙе оҙаҡ көтөргә тура килмәне: фин егете Арттури Лехконен тәүге шайбаны индерҙе. Латыштар ҙа яуапты оҙаҡҡа һуҙманы: бер аҙҙан Николай Елисеев иҫәпте тигеҙләп тә ҡуйҙы. Шулай ҙа финдарға ҡаршы торорҙай көс тапманы улар, уйын 5:1 иҫәбе менән тамамланды.
Бер аҙҙан “Өфө-Арена”ла майҙанға Канада менән Германия командалары сыҡты. Көсөргәнешле ярышта канадалар дәғүәселәрен 9:3 иҫәбенә теҙ сүктерҙе.
Ә бына Рәсәй егеттәре Словакия командаһын бары овертаймда ғына 3:2 иҫәбенә еңеүгә өлгәште.
Чемпионат дауам итә.