Сочиҙа үтәсәк ҡышҡы Олимпиада уйындарына теүәл 500 көн ҡалды. Ошо айҡанлы “Сочи-2014” ойоштороу комитеты барлыҡ илдә ҙур байрам үткәрҙе. Рәсәйҙең 17 ҡалаһында спорт һәм мәҙәни саралар гөрләне, волонтерҙар ҡатнашлығында ярыштар йәнле барҙы.

Акцияға Өфө йәштәре лә әүҙем ҡушылды. Был көндә баш ҡаланың Ленин исемендәге майҙаны күңелле ауаздарҙан гөрләп торҙо.
Эстафета ярыштары ҡышҡы спорт төрҙәренән ғибәрәт ине. Башҡорт дәүләт медицина университеты, “Индиго” үҙәге волонтерҙары 500 метр алыҫлыҡҡа коньки урынына ролик кейеп, шайба урынына туп менән таһыллыҡта көс һынашты.
Республикабыҙҙа спортҡа етди иғтибар бирелә. Йыл һайын Өфөлә 12 спорт төрө буйынса уҡыусылар спартакиадаһы үтә. Сарала ошо ярыштың былтырғы уҡыу йылындағы еңеүселәре билдәләнде.
Унан, VI Халыҡ-ара ҡышҡы балалар уйындарының символикаһы төшөрөлгән байраҡ тотоп, майҙанға балалар сыҡты. Мәғлүм булыуынса, донъя күләмендәге был ярыш 2013 йылдың 26 февралендә Өфөлә үтәсәк. Унда барлыҡ илдәрҙән 12 – 15 йәшлек меңдән ашыу спортсы ҡатнашасаҡ.
Өфөнөң ете районынан Халыҡ-ара ҡышҡы уйындарҙа ҡатнашасаҡ командалар үҙ-ара боҙҙағы хоккей буйынса көс һынашты.
Байрамда ҡатнашыусыларға “Мегафон” компанияһы, башҡа бағыусылар үҙенсәлекле бүләктәр тапшырҙы.
Сараға Паралимпия чемпиондары Оксана Савченко, Андрей Коптин, Михаил Зимин, Илдар Помыкаловтар килгәйне. Йәштәр, уҡыусылар билдәле спорт “йондоҙҙары” менән аралашты, үҙҙәрен ҡыҙыҡһындырған һорауҙарҙы бирҙе, автограф алып ҡыуанды.