Омскиҙың "Авангард"ынан, аҙаҡ көтмәгәндә Астананың "Барыҫ"ынан еңелгәндән һуң, юлаевсыларҙың "ҡапҡаһына таш атыусылар" бермә-бер артты. Миҙгелдең тәүге биш уйынында ни бары бер еңеү "Салауат Юлаев" кеүек команда өсөн ҡаҙаныш түгеллеген бөтәһе лә асыҡ төшөндө. Шуға ла тренер штабы өсөн бер еңеү менән булһа ла Өфөгә әйләнеп ҡайтыу төп маҡсатҡа әйләнде.
– Уйынсыларыбыҙ боҙға һуңғы уйынға сыҡҡан кеүек булды, – тине "Югра" менән алыштан һуң баш тренер Венер Сафин. Ысынлап та, сираттағы еңелеүҙе ҡайһы бер көйәрмәндәр ғәфү итмәҫ ине. Әммә хоккейсыларыбыҙ боҙҙа ҡаршы яҡты ғына түгел, ә иң тәүҙә үҙ-үҙен еңеп, ниһайәт, миҙгелдә икенсе тапҡыр өс мәрәй яулай алды.
Был юлы ла иҫәпте юлаевсылар асты. "Барыҫ"ты ла уйын барышында еңеп килеп, аҙаҡ теҙ сүктек бит. Шуға ла тынысланырға иртәрәк ине. Ысынлап та, икенсе осор тамамланып та өлгөрмәне, "Югра" уйынсылары Вадим Тарасовтың ҡапҡаһы артында "ҡыҙыл ут" тоҡандырҙы.
Аҙаҡ та беҙҙең ҡапҡа эргәһендә "дауыл" уйнаны тиһәк, хата булмаҫ. "Югра" бөтөн көсөн йыйып һөжүмгә ташланды. Әммә үткән уйында Ҡазандың "Аҡ барыҫ"ын теҙ сүктереүгә ҙур көс һалғанғамы, был юлы нисектер килеп сыҡманы. Беҙҙән Ииро Тарккиға алмашҡа сыҡҡан Вадим Тарасов та ҡапҡала һынатырға теләмәне, буғай.
Өсөнсө осорҙа уйындың "теҙгенен" беҙҙекеләр тулыһынса үҙ ҡулына алды. Тегеләр ҙә быны төшөнөпмө, артыҡ ҡаршылашманы. Һөҙөмтәлә Михаил Бирюковтың ҡапҡаһы артында тағы ике мәртәбә "ҡыҙыл ут" тоҡанды. Шайбаларҙы Денис Хлыстов менән Андрей Зубарев сәпәне. Был – миҙгелдәге икенсе еңеүебеҙ ине.
Әйткәндәй, тәүге уңышһыҙлыҡтарҙан һуң күптәр беҙҙең тренер штабын “отставкаға ебәрергә” ашыҡты. Әммә баш тренер уйынсылар урынына боҙға үҙе сыға алмай. "Югра" менән осрашыу тағы бер ҡабат шуны раҫланы: беҙҙекеләрҙең ҡеүәте бар! Киләһе "Өфө-Арена"лағы уйында командабыҙ океан аръяғындағы локаут арҡаһында Евгений Малкин, Сергей Гончар, Николай Кулемин кеүек "йондоҙҙар" менән тулыланып, Гагарин кубогына төп дәғүәсегә әүерелгән Магнитогорскиҙың "Металлург"ы менән осрашасаҡ.