Алтын, алтын, рекорд… Ана шулай еңеү артынан еңеүҙәре менән ҡыуандырҙы XIV Йәйге паралимпия уйындарында ҡатнашҡан яҡташтарыбыҙ. Һөҙөмтәлә рәсәйҙәр яулаған 36 алтын миҙалдың 12-һе – Башҡортостан спортсыларыныҡы! Шулай итеп, миҙалдар һаны буйынса, Ҡытайҙан ғына ҡалышып, икенсе урынға сыҡтыҡ.
Башҡортостан Президенты Рөстәм Хәмитов Паралимпиадала ҡатнашҡан спортсылар, уларҙың тренерҙары менән осрашыу ваҡытында һоҡланыуын йәшермәне.
– Сығыштарығыҙҙы барлыҡ республика халҡы менән ҡарап барҙыҡ. Һеҙҙең өсөн тулҡынландыҡ, өмөтләндек, борсолдоҡ. Бығаса беҙҙекеләрҙең бындай ғәжәп уңышҡа өлгәшкәне юҡ ине. Һеҙ батырлығығыҙ, ихтыяр көсөгөҙ менән күптәр өсөн өлгө булып тораһығыҙ. Ҙур рәхмәт! – тине.
Республика башлығы киләсәктә спортсыларҙың халыҡты һау-сәләмәт тормош өлгөһөнә йәлеп итеү йәһәтенән әүҙем тәрбиәүи эш алып барыуын, йәштәр менән осрашыуҙар үткәреүен, матбуғат аша сығыш яһауҙарын теләне.
Һуңынан Рөстәм Хәмитов Паралимпиада чемпиондары Михаил Зимин, Андрей Коптев, Алексей Лабзин, Александр Неволин-Светов, Анастасия Овсянникова, Елена Паутова, Илья Первухин, Оксана Савченко, Анна Сорокиналарға фатирға сертификат тапшырҙы.
Дәүләт Думаһы депутаты, Рәсәй Паралимпия комитетының вице-президенты Рима Баталова үҙ сығышында Башҡортостан паралимпия спортсыларының һәр саҡ айырылып тороуы, бөгөн йәштәрҙең эстафетаны уңышлы дауам итеүе хаҡында ғорурланып һөйләне.
Спортсылар, тренерҙар үҙ сиратында иғтибары, уларҙың хәле менән ҡыҙыҡһынып торғаны өсөн республика башлығына рәхмәт әйтте.
Төштән һуң “Башинформ” агентлығында Паралимпиада еңеүселәре ҡатнашлығында матбуғат конференцияһы үтте.