Йөҙләгән кешенең шатлыҡ ауазы, сәскә гөлләмәләре, алтын һәм көмөш миҙалдар сыңлауы... "Өфө" аэропортында бындай оло байрамдың булғаны юҡтыр. Кисә төндә Башҡортостан көйәрмәндәре Лондондағы XIV Йәйге паралимпия уйындарында ҡатнашҡан 16 яҡташыбыҙҙы шулай ҙурлап ҡаршыланы.
Ҙурламаҫлыҡ та түгел! Рәсәй йыйылма командаһы иҫәбендәге 36 алтын миҙалдың һәр өсөнсөһөн Башҡортостандыҡылар яуланы, тағы ла биш көмөш миҙалға эйә булды. Хәтерегеҙгә төшөрәбеҙ: алтын миҙалдар һаны буйынса Рәсәй Ҡытайҙан һуң икенсе урынға сыҡты.
Тыуған Башҡортостанға ҡайтыр алдынан паралимпиясыларыбыҙ Мәскәүҙә Шереметьево аэропортында ла баш ҡалала йәшәгән яҡташтарыбыҙҙың ҡотлауын ҡабул иткәйне. Унда спортсыларҙы сәләмләп елберҙәгән Башҡортостан флагын үҙәк телевидениенан барыһы ла күргәндер. Быйылғы Паралимпиадала биш тапҡыр еңеү яулаған йөҙөүсе Оксана Савченкоға беренсе булып һүҙ бирелгәс, ул республикабыҙ етәкселегенә рәхмәт еткерергә ашыҡты.
— Ярыштар мәлендә Башҡортостандан гел шылтыратып, хәлемде белешеп торҙолар, республика Президенты Рөстәм Хәмитов үҙе ике тапҡыр шылтыратты. Бындай иғтибар барыбыҙҙы ла еңеүгә рухландырҙы. Ошондай уңыштарға өлгәшеүебеҙҙе күреп, физик мөмкинлектәре сикләнгән башҡа кешеләр ҙә яңы һәләттәрен асырға, спорт менән шөғөлләнергә тырышыр тип өмөтләнәм, — тине чемпионыбыҙ.
Иртәгәһенә, 11 сентябрҙә, Рәсәй йыйылма командаһы Кремль һарайына Рәсәй Президенты Владимир Путин менән осрашыуға йыйылды. Унда Паралимпиада еңеүселәренә дәүләт наградалары тапшырылды. Оксана Савченко — Дуҫлыҡ, Александр Неволин-Светов, Елена Паутова менән Алексей Лабзин Почет ордендары менән бүләкләнде. Бронза һәм көмөш миҙал алыусыларҙы Рәсәй Президенты Хакимиәте етәксеһе Сергей Иванов тәбрикләне.
— Һеҙ юғары оҫталыҡ күрһәттегеҙ. Ихтыяр көсө, ынтылыш менән һоҡландырҙығыҙ һәм командабыҙҙы донъя паралимпия спортының лидерҙары рәтенә сығарҙығыҙ. Дүрт йыл элек кенә Пекиндағы Паралимпиадала беҙ һигеҙенсе урында булғайныҡ. Лондонда икенсе баҫҡысҡа күтәрелдек. Был, ысынлап та, ҙур ҡаҙаныш! — тине Владимир Путин.
Шишәмбенән шаршамбыға ҡарай төндә, ниһайәт, чемпиондарыбыҙ ҡайтып етте. Уларҙы Башҡортостан йәштәр сәйәсәте һәм спорт министры Андрей Иванюта, Өфө ҡалаһы хакимиәте хеҙмәткәрҙәре, Башҡортостандың Юғары спорт оҫталығы үҙәге менән Бөтә Рәсәй инвалидтар йәмғиәтенең төбәк ойошмаһы вәкилдәре, спортсыларҙың яҡындары һәм дуҫтары, журналистар ҡаршыланы.
Һуңғы мәғлүмәттәр буйынса, еңеүсе яҡташтарыбыҙ менән уларҙың тренерҙарын бүләкләү өсөн республика бюджетынан 32 миллион һум аҡса бүлеү күҙаллана.