Лондонда уҙған Паралимпиаданың һөҙөмтәһе Рәсәй халҡында ҙур ҡыуаныс уятты: беҙҙең команда алтын миҙалдар һаны буйынса ҡытайҙарҙан ҡала икенсе урынды яуланы. Башҡортостан халҡы иһә икеләтә ғорурлыҡ тойғоһо кисерә: илебеҙ өлөшөнә төшкән 36 алтын миҙалдың 12-һен яҡташтарыбыҙ алды!
Өфө студенты Оксана Савченко миҙалдар һаны һәм дәрәжәһе буйынса Рәсәй йыйылма командаһының иң яҡшы спортсыһына әүерелде — йөҙөүсе ҡыҙ биш дистанцияның барыһында ла еңеүсе булды. Еңел атлеттар Алексей Лабзин (ике "алтын" һәм бер "көмөш"), Елена Паутова, Андрей Коптев, Анастасия Овсянникова (берәр "алтын"), Анна Сорокина (көмөш миҙал), йөҙөүсе Александр Неволин-Светов (бер "алтын" һәм өс "көмөш") һәм Михаил Зимин (бер "алтын") да Башҡортостандың бәҫен арттырҙы.
Рәсәйҙең спорт министры Виталий Мутко спортсыларыбыҙҙың уңышын айырым билдәләргә өлгөрҙө.
“Башҡортостан вәкилдәренең Паралимпиадала ниндәй уңышҡа өлгәшеүен барыбыҙ ҙа күреп торабыҙ. Өфөлә республика Президенты һәм спорт министрлығы (Башҡортостандың Йәштәр сәйәсәте һәм спорт министрлығы. — Ред.) спортсы инвалидтар мәсьәләһенә һәм паралимпия спортының үҫешенә етди иғтибар бүлә. Беҙ иһә "2005 — 2015 йылдарға физик культура һәм спортты үҫтереү" федераль маҡсатлы программаһы буйынса унда ҡеүәтле әҙерлек үҙәге төҙөргә уйлайбыҙ”, — тигән ул Рәсәй Спорт министрлығының матбуғат үҙәгенә биргән интервьюһында.
Паралимпиадала ҡатнашыусыларҙы бөгөн Кремлдә хөрмәтләп ҡаршылайҙар. Тәүҙә Рәсәй Президенты Хакимиәте етәксеһе Сергей Иванов көмөш һәм бронза миҙал яулағандарҙы ҡотлай, һуңынан Рәсәй Президенты Владимир Путин еңеүселәрҙе бүләкләй. Төнөн "Өфө" аэропортында Башҡортостан паралимпиясыларын ҡаршы алыу көтөлә.