— Ҡасан майҙанға Денис сыға?
Тамашасылар тәүҙә “Өфө-Арена” боҙ һарайында башҡа көрәшселәрҙең алышын ҡыҙыҡһынып күҙәтһә лә, “Сыңғыҙхан”ды таптыра башланы. Барыбыҙ ҙа грузин Нугзар Маргелашвилиҙы, итальян Джузепе Лауриҙы, шотланд Ли МакАллистерҙы нокаутҡа ебәргән башҡорт батырын Өфөлә күптән көттөк.
Ниһайәт, комментатор рингка Денис менән Куба итальяны Брунет Замораның сығыуын иғлан итте. Ҡамсат бүректә, еләндә ғорур атлап килгән егетте күргәс, залдағылар, гүйә, урынынан ҡупты. Ҡул сабалар, һыҙғыралар. Бындай тулҡынланыуҙан йөрәк дөп-дөп тибә: донъяны шаулатҡан башҡорт батыры ата-бабалары ерендә, беҙҙең алда тора!
Тәүге раундта бокссылар бер-береһен “ҡапшап” ҡараны. Әлбиттә, был егеттәрҙең тәүге алышы түгел – 2010 йылда улар осрашҡайны. Ярышты ҡарап барған көйәрмәндәр, сит ил, Рәсәй белгестәре, Денисты дәғүәсеһенән күпкә көслөрәк тиһә лә, судьялар иҫәпте тигеҙләй ҙә ҡуя. Шулай итеп, WBA Интерконтиненталь чемпионы титулы Заморала ҡала. Бөгөн улар икеһе лә Европаның уртаса ауырлыҡтағы иң яҡшы профессиональ бокссыһы һанала.
Егеттәр араһындағы көсөргәнешле алышты халыҡ күҙ яҙлыҡтырмай күҙәтте.
– Ҡайһылай еңел йөрөй, кәүҙәһе уйнап тора! – Тамашасыларҙың иғтибары айырыуса Дениста.
— Берҙе һал! – тип һөрәнләй кемдер.
— Нокдаунға ебәр! – Икенселәре иһә батырҙы дәртләндерергә тырыша, өсөнсөләре республика байрағын болғай.
Икенсе раундта Денис, дәғүәсеһенә елле генә эләктереп, үҙенең иҫәбен ярайһы ғына яҡшыртты. Замора ла сос. Шафиҡовтың тос йоҙроғонан янтайып ҡотолоп ҡала. Туғыҙынсы раундта ул Шафиҡовҡа ныҡ ҡына эләктереп, үҙ иҫәбенә мәрәй өҫтәп тә ҡуйҙы. Әммә…Юҡҡа ғына боксты иң ауыр спорт төрө тип әйтмәйҙәр. Аҙаҡҡы минуттарҙа икеһенең дә арығанлығы һиҙелә башланы. Шулай ҙа дөмбәҫләшеүҙең ахырына тиклем ныҡ торҙолар.
Кем еңер? Барыһы түҙемһеҙләнеп ярыштың һөҙөмтәһен көтә. Йөрәк дөп-дөп тибә. Бына судьяның ҡарары яңғыраны.
Европа чемпионы билбауы – Денис Шафиҡовта! Шуны ғына көткән зал йәнә зыҡ ҡупты!
Ҡотлайбыҙ, башҡорт егете!
Рәсәй Дәүләт Думаһы депутаты, Бөтә донъя башҡорттары ҡоролтайы башҡарма комитеты рәйесе Марсель Йосопов, чемпионды тәбрикләп, елән менән ҡамсат бүрек кейҙерҙе.