Дыуан районы тарихында тәү тапҡыр балаларҙы фигуралы шыуыуға өйрәтә башлаясаҡтар. Мәсәғүттәге балалар-үҫмерҙәр спорт мәктәбе тап ошо йүнәлештә эшләргә йыйына.

I-III класс уҡыусылары менән Өфө ҡыҙы, спорт мастерлығына кандидат, республика чемпионкаһы Валерия Храмцова шөғөлләнәсәген ишетеү менән ата-әсәләр, ябырылып тигәндәй, тренерҙы эҙләй, телефон сымы өҙлөкһөҙ шылтыратыуҙарҙан өҙөлөрҙәй булып ҡыҙа — барыһы ла балаларының фигуралы шыуыу менән шөғөлләнеүен теләй. 15 кешенән торған өс төркөм әҙер ҙә инде.

Район хакимиәте башлығы Ф. Мөхәмәҙиев тә, башланғысты хуплап, 25—30 пар коньки алырға вәғәҙә иткән.