Ғафури районының Ҡауарҙы ауылында ХV шахмат фестивале булып үтте
1998 йылда Ҡауарҙы ауылының бер төркөм зыялылары ауылда шахмат фестивале үткәрергә ҡарар итә. Ниәт иткән — мораҙына еткән, тиҙәр. Шул йылда шахмат фестивале ойошторолоп, унда өс — Ҡауарҙы, Красноусол һәм район йыйылма командалары ҡатнаша һәм хужалар беренсе, Красноусол — икенсе, район йыйылма командаһы өсөнсө урынды ала. Шунан бирле Ҡауарҙыла шахмат фестивале даими үткәрелә. 2001, 2002 йылдарҙа был спорт байрамына Архангел районы ҡушылһа, 2006 йылдан башлап Ҡырмыҫҡалы районы командаһы бер йыл да ҡалдырмай ҡатнашып килә.
ХV Ҡауарҙы шахмат фестиваленә, ғәҙәттәгесә, дүрт — Ҡауарҙы, Красноусол ауылы һәм Ғафури, Ҡырмыҫҡалы район йыйылма командалары килгәйне. Һәр командала 20-шәр спортсы булып, улар үҙ-ара берәр осрашыу үткәрҙе. Былтыр Ҡырмыҫҡалы район йыйылма командаһы, иң күп мәрәй туплап, “Ҡауарҙы күсмә кубогы”на эйә булғайны. Әммә быйыл уларҙың әҙерлек кимәле түбәнерәк булдымы, дәғүәселәр көслөрәкме, тәүге партияла уҡ Красноусол йыйылма командаһына 7,5:12,5 иҫәбенә еңелде. Ҡауарҙыларҙы ла еңә алманылар. Тик Ғафури йыйылма командаһынан ғына мәрәй тартып алыуға өлгәштеләр. Бының сәбәбе шунда: ғафуриҙар тулы түгел ине. Салауат Түзбәков, Рәфис Рәшитов, Мөхәммәт Урманшин кеүек көслө шахматсылар булыуға ҡарамаҫтан, команда тулы булмағас, тейешле мәрәй йыя алманылар. Уның ҡарауы, быйыл майҙан хужалары — ҡауарҙыларҙың командаһы — көслө шахматсылар менән тулыланғайны. Бик күп шахматсылар тәрбиәләп сығарған Рим Насиров, район йыйылма командаһында уйнап йөрөүсе Сабир Исхаҡов, Өфөлә йәшәүсе ҡауарҙыларҙан Райфат Исхаҡов, Әмирйән Ҡалмырҙин кеүек көслө шахматсыларға быйыл баш ҡаланың 3-сө гимназияһы уҡыусылары — бер туған Рәшит менән Динар Әбелғужиндар ҡушылды. Рәшит II, Динар VII класта ғына уҡып йөрөһә лә, күп тапҡыр Өфө ҡалаһы һәм Башҡортостан чемпионы исемен яулауға өлгәшкәндәр.
Эйе, ошондай көслө уйынсылар булғанда Ҡауарҙы командаһы бирешә буламы һуң?! Быйыл иң күп мәрәй туплап, хужалар күсмә кубокты үҙҙәрендә ҡалдырҙы. Красноусол ауылы йыйылма командаһы — икенсе, Ҡырмыҫҡалы районы командаһы өсөнсө урынды алды.