Ошо көндәрҙә Владимир Путин Кремлдә Пхенчхандәге Олимпия уйындары еңеүселәренә һәм призерҙарына дәүләт наградаларын тапшырҙы. Рәсәй Президенты менән осрашыуға саҡырылғандар араһында Рәсәй атлеттары командаһына тәүге миҙал килтергән Семен Елистратов менән алтын миҙал яулаған Өфө хоккей клубы тәрбиәләнеүсеһе Андрей Зубарев та бар ине.

Семен Елистратовҡа дәүләт башлығы II дәрәжә “Ватан алдындағы хеҙмәттәре өсөн” орден миҙалын, ә Андрей Зубаревҡа Дуҫлыҡ орденын тапшырҙы.
– Олимпиадаға барыу-бармау мәсьәләһе күтәрелгәс, Владимир Владимирович, һеҙ беренсе булып, әлбит­тә, барабыҙ, тигәйнегеҙ! Булышлыҡ күрһәткәнегеҙ, ышаны­сығыҙ өсөн Һеҙгә рәхмәт. Беҙҙең артта бик күп кеше – ата-әсәләр, хәләл ефеттәр, ғаиләләр, дуҫтар, көйәрмәндәр һәм, әлбиттә, тренерҙар, уҡытыусылар тора. Беҙ бурысты үтәнек, артҡа сигенмәнек. Минеңсә, илебеҙҙе яҡшы яҡтан күрһәттек. Тағы ла дүрт йылдан ошонда ҡайтанан осрашырға насип итһен, – тине Семен Елистратов.
– Рәсәй көйәрмәндәре өсөн хоккей­ҙа еңеүебеҙ ғәйәт ҙур бүләк булды. Милли боҙ дружинаһы бер аҙ бор­солорға мәжбүр итһә лә, бөтә көсөн туплап, көтөп алынған Олимпия алтынын яуланы, – тине Владимир Путин.
Андрей Зубарев еңеү өсөн 4 миллион һум һәм BMW X6 автомобилен, Семен Елистратов иһә 1 миллион 700 мең һум һәм BMW X4 автомобилен аласаҡ. Республикабыҙҙан Семенға тағы ла 500 мең һум тапшырыла.