Континенталь хоккей лигаһының сираттағы миҙгелен юлаевсылар уңышлы башлап ебәрҙе. Әммә барыһы ла шыма ғына барманы тәүге матчта...

Владивостоктың “Адмирал” командаһы август уртаһынан бирле Өфөлә. Миҙгел алды турнирында ҡатнашты ул. Шуғамы, чемпионаттың беренсе осрашыуында ла үҙен хужаларса тотто. Беҙҙең хоккей­сыларға баш ҡалҡытырға ла ирек бирмәй, ҡунаҡтар бер-бер артлы һөжүм итеп кенә торҙо. Уйын башла­ныуға биш минут та үтмәне, юлаевсы Илья Зубов үҙ зонабыҙҙа тупаҫ хаталанды. Шуны ғына көткән “адмиралдар” ҡаршы яҡҡа елдерҙе! Өсәүләп бер-береһенә пас бирә-бирә, беҙҙең һаҡсы­ларҙың башын әйләндереп, ҡапҡабыҙға тәүге голды индереп тә ҡуйҙылар...
Етмәһә, алдынғы “өс таға­ныбыҙ” Умарк, Кемппайнен, Хартикайнендың эше алға барманы ла ҡуйҙы. Шул саҡта иң һуңғы – дүртенсе – звено үҙ һүҙен әйтте. Евгений Коротков менән Вячеслав Солодухин көйәр­мәндәрҙең ышанысын аҡланы. Осрашыу һуңында Филип Ларсен иһә уңышты нығытып ҡуйҙы – 3:1. Тир түгеп яуланған еңеү булды был.