Ҡаланың 4-се лицейында эшләгән “Шторм” баскетбол клубы командаһы өсөнсө тапҡыр Волга буйы федераль округының “КЭС-БАСКЕТ” мәктәп баскетбол лигаһы чемпионатында еңеү яуланы. Тренер Ринат Муҡаев етәкселеген­дә­ге ҡыҙҙар командаһына иң көслөләр менән алышырға тура килһә лә, бирешмәйҙәр. Был ярышта Башҡортостан данын Баймаҡ ҡалаһы ҡыҙҙары уйнаған “Шторм” менән Белореттан “Металлург” үҫмер егеттәр командалары яҡлай.
Баймаҡтарҙың еңеүе ниге­ҙендә тренерҙың оло хеҙмәте ята.
— Ҡыҙҙар спорт залында йыл әйләнәһенә алһыҙ-ялһыҙ шөғөлләнә. Йәйгеһен башҡа балалар ял иткәндә лә күнекмәләр менән мәшғүлдәр, – ти Ринат Муҡаев.
Баймаҡ һылыуҡайҙарының уңышында шулай уҡ ата-әсәләренең дә өлөшө шаҡтай ҙур. Балаларын көн һайын күнекмәләргә йөрөтөргә, уларҙың уйынын Интернеттан онлайн тәртибендә күҙәтеп барырға ла, ҡыҙ­ҙары менән бергә көрәшергә, еңергә лә өйрәнә улар. Иң мөһиме – балаларына ныҡлы терәк, ярҙамсы булып, ышаныс биргәндәр ҙә тап улар.
Ҡаршы уйнаған команда­ларҙың көслө булыуы лицей ҡыҙҙарына сәм генә өҫтәй. “Көрәшеүе еңелдән түгел, әммә беҙ һәр саҡ Баш­ҡортостан спортының данын яҡлағаныбыҙҙы онотмайбыҙ һәм еңелергә хаҡыбыҙ юҡлығын аңлап торабыҙ”, — тип йылмая улар.
Күптән түгел “Шторм” командаһы йәнә оло уңыш менән ҡайтты. Пермдә үткән “КЭС-БАСКЕТ” мәктәп баскетбол лигаһы чемпиона­тының суперфиналында бай­маҡтар Владимир, Мәскәү, Ленинград өлкәләре, Ҡыр­ғыҙстан командаларын еңеп, 4-се урынды яуланы. Команда капитаны Әлфиә Ғә­лим­йәнова – оҫталыҡ конкурсында еңеүсе, Элиза Исмәғилева иң яҡшы үҙәк һөжүм итеүсе булып танылды.