“Салауат Юлаев” ситтә уйындарын үткәргәндә, Өфөләге Бәләкәй аренала следж-хоккей алышы ҡыҙа. Һаулығы буйынса мөмкинлеге сикләнгән Рәсәй, Италия, Чехия, Ҡытай спортсылары үҙ-ара иң көслөнө асыҡлай.
Әммә беҙҙең юлаевсылар көйәрмәндең кәйефен төшөрөүен дауам итә. Ҡаҙағстанда уңышһыҙлыҡҡа юлыҡҡас, Ҡазанда хәлде төҙәтерҙәрме тиһәк, юҡ. Унда ла “Аҡ Барыҫ”ҡа овертаймда еңелеп ҡуйҙылар (5:6).
Ә бына следж-хоккейсыларыбыҙ ҡыуандыра. Тәүге көндө итальяндарҙы 2:1 иҫәбенә отһалар, иртәгәһенә чехтарҙы өҫтәмә ваҡытта еңделәр. Ҡытай спортсыларын бөтөнләй ҡыйраттылар (9:0). Ошо матчта яҡташыбыҙ Рөстәм Нәбиев тә үҙенең карьераһындағы тәүге голын индерҙе. Ни әйтәһең, афарин! Һөҙөмтәлә беҙҙең ил командаһы “Феникс” финал уйынына сыҡты һәм унда ла 7:1 иҫәбенә еңеү яуланы. Ирекһеҙҙән уйлап ҡуяһың, кем көслөрәк – һап-һау юлаевсылармы, әллә мөмкинлектәре сикләнгән “феникс”тармы?