Өфө ҡалаһы ҙур хоккей байрамы сиктәрендә гөр килеп торғас, “Салауат Юлаев” уйындарын ситтә уҙғарырға мәжбүр. Әле уларҙың юлы Ҡаҙағстанға төштө.
Хәйерле башланғайны ла матч. Юлаевсы Томаш Мертл иҫәпте асып ебәрҙе. Әммә “Ба­рыҫ” хоккейсылары уны тигеҙләп кенә ҡалманы, йәнә ике шайба индереп, алға сығып та китте – 3:1. Беҙҙекеләрҙән Максим Майо­ров бер гол кереткәс, өмөт уянғандай булды.
Ә иҫәпте кем тигеҙләнеме? Ышанаһығыҙмы-юҡмы, миҙгелдә тәүге шайбаһын индергән Александр Нестеров. Ғөмүмән, был һөжүм итеүсе йылына бер нисә генә гол керетә. Былтыр дүрт тапҡыр уңышҡа өлгәшкәйне.
3:3. Йәнә овертайм. Юлаев­сыларҙың осрашыу һайын тиерлек өҫтәмә ваҡытта уйна­ғандарына өйрәнеп тә бөтөлдө инде. Әммә быныһы оҙаҡҡа һуҙылманы – беҙҙең һаҡсы­ларҙың яй ҡыланыуы арҡаһында хужалар еңеү шайбаһын индерҙе. Исмаһам, бөгөн Ҡазанда йүнле уйын күрһәтербеҙме-юҡмы...