Был һанды ҡулға алғанда, йылдың иң-иң һуңғы уйыны ла үткән, көйәрмәндәрҙе Ҡыш бабай ҙа ҡотлаған, боҙ аренаһы йомшаҡ уйынсыҡтарға ла күмелгән булыр инде. Һүҙ “Салауат Юлаев”тың кисә уҙған матчы тураһында.
Яңы йыл байрамы алдынан аҙаҡҡы осрашыуҙа ғәҙәт буйынса “Өфө-Арена”ла боҙға Ҡыш бабай менән Ҡарһылыу сыға, ә уйын ҡарарға килгән кеше­ләр йомшаҡ уйынсыҡ һа­тып алып, иң һуңынан улар­ҙы майҙансыҡҡа ташлай. Шул рәүешле йыйыл­ған бүләк­тәр артабан балалар йорттарына, приют­тарға оҙатыла.
Был юлы юлаевсылар алдына ғәйәт мөһим бурыс ҡуйылған. Беренсенән, декабрь айында уларҙың бер генә тулы рәүешле еңеүе лә юҡ, гел мәрәй юғалт­тылар. Бына “Лада”нан да 4:6 иҫәбенә отолоп ҡуйҙы­лар. Икенсенән, дәғүәсе лә кем бит әле! Күрше өлкә­ләге Магнитогорскиҙың “Металлург”ы!
Тимәк, еңелергә һис ярамай. Шуға өмөт итәйек, юлаевсыларҙан байрамға шәп бүләк көтәйек.