“Салауат Юлаев” командаһы көйәрмәне киске сәғәт 7-лә, ғәҙәттә, телевизорын ҡабыҙа. Ә бәхетлеләр матчтарҙы Өфөләге боҙ һарайына уҡ барып ҡарауға өлгәшә. Ләкин һуңғы арала кәйеф күтәрерлек һөҙөмтә күренмәй.

Юлаевсылар үҙ холоҡ­тарына тоғро. Йәғни сентябрь-ноябрь буйына беҙҙең түҙемлекте һынайҙар. Матур уйнап китерҙәрме тиһәң, йәнә уңышһыҙлыҡҡа осрай­ҙар. Ә көйәрмәнгә еңеү генә кәрәк!
Әле бына Екатеринбургта “Автомобилист”ан буллит буйынса отолдолар (3:4). Өфөгә ҡайтыу менән Рига­ның “Динамо”һына ла бул­литтарҙа бирешеп ҡуйҙылар (2:3). Баш тренер ҙа хәл иткес мәлдә икенсе ҡапҡа­сыбыҙ Андрей Гавриловты һынап ҡарамаҡсы булды. Бигүк уңышлы булманы был ҡарар.
Ғөмүмән, тәртип аҡһаң­ҡырай әле командала. Һуңғы өс уйында ла шул күҙгә ташланды: ҡапҡабыҙға гол ингәс кенә геройҙарса иҫәпте тигеҙләргә ашығабыҙ. Шунан аҡтыҡ хәлде сарыф итеп, отолоп та ҡуябыҙ... Шулай ҙа артыҡ көйәләнмәйек, сөнки миҙгел саҡ башланып тора, бәхетле мәлдәр алдалыр әле.