Бына был уйын! Әйтерһең дә, юлаевсыларҙың плей-офтағы ун бишенсе түгел, беренсе матчы. Оҙағыраҡ ял иткән “Металлург” хоккейсыларынан да етеҙерәктәр. Әммә был уларҙы ҡотҡарманы, бер бәхетһеҙ осраҡ баштарына етте...Овертаймды шулай атау дөрөҫөрәк тә. Уға барып еткәс, командаларҙың көсө тигеҙ, тимәк. Өҫтәмә ваҡытта кем даланлыраҡ, уңыш шуға йылмая ла инде.
Әйткәндәй, беҙҙең ҡапҡасы Никлас Сведбергтың әҙерлегенә нығыраҡ хәүефләнгәйнек. Йәнәһе, иғтибарһыҙлыҡ күрһәтеп, ҡапҡаһына гол индертеп ҡуймаһын. Киреһенсә, иҫ киткес оҫта уйнаны ул. Нисәмә тапҡыр “Салауат Юлаев”ты ҡотҡарҙы.
Ләкин хужаларҙың һәләтле һөжүм итеүсеһе Сергей Мозякины бар. Уның ҡулын бәйләү сараһын тапмаһаң, ҡапҡаңа шайба индергәнен көт тә тор. Шулай булды ла. Өсөнсө осор аҙағына иҫәп 2:2 булғас, командаларҙың көндәре овертаймға ҡалды. Беренсе егерме минут һөҙөмтәһеҙ уҙҙы. Ә бына икенсеһендә Мозякин оҫталығын иҫбатланы ла инде. Бында Сведбергты һис ғәйепләп булмай, хатта йәл әле ул.
Бөгөн Магнитогорскиҙа икенсе матч була. Өфөләрҙән матур уйын ғына түгел, еңеү ҙә көтәбеҙ!