Өфөләге театрҙарҙың актерҙары араһында мини-футбол буйынса беренсе чемпионат үткәрелде. Сараны Башҡортостандың Театр эшмәкәрҙәре союзы ойошторҙо.

Өс сәғәтлек көсөргәнешле уйын йомғаҡтары буйынса еңеүселәр билдәләнде. Беренсе урынға Өфө “Нур” татар театры, икенсегә — Мостай Кәрим исемендәге Милли йәштәр театры, өсөнсөгә Рус драма театры командалары сыҡты. Турнирҙа ҡатнашыусыларҙың барыһына ла кубоктар һәм дипломдар тапшырылды.
Сараны ойоштороу комитеты рәйесе Хөрмәтулла Үтәшев әйтеүенсә, еңеүселәргә көйәрмәндәр ҙур ярҙам күрһәтте. Улар яратҡан актерҙарын хуплап плакаттар әҙерләгән. Рус һәм Йәштәр театрҙары актерҙарының иң әүҙем көйәрмәндәре лә бүләкһеҙ ҡалманы.
Актерҙар араһында тиҙҙән волейбол буйынса чемпионат үткәреләсәк.