Рәсәй йыйылма командаһы Тольяттиҙа уҙған боҙҙағы мотоуҙыш буйынса 38-се донъя чемпионатында ышаныслы еңеү яуланы. Ул, Швеция һәм Австрия командаларын артта ҡалдырып, 57 мәрәй йыйҙы.
Командабыҙ капитаны Николай Красников был чемпионатта үҙенең 20-се алтын миҙалын алды. Әйткәндәй, ул шәхси уҙышта һигеҙ тапҡыр чемпион титулына лайыҡ булғайны, йыйылма команда составында иһә тағы ла 12 тапҡыр еңеүгә өлгәшкәйне. Әлеге чемпионатта командабыҙға Красников 19, донъя чемпионы Дмитрий Колтаков – 23, ә Дмитрий Хомицевич 15 мәрәй килтерҙе.
Ғөмүмән, 38 донъя чемпионатының 34-ендә Рәсәй командаһы еңеп сыҡты. 2003 йылдан алып улар еңелеү белмәй.