Ике аҙна еңеү күргән юҡ. Һуңғы дүрт уйында ла “Салауат Юлаев” отолдо. Был – көйәрмән өсөн ҡара ҡайғы. Өмөтһөҙ – шайтан, тиергә генә ҡала...Юлаевсыларҙың баш тренеры Игорь Захаркин физик көс етешмәүенә, шуға күрә өсөнсө осорҙа насар уйнауыбыҙға зарланғайны. Хәл былай барһа, плей-офта тәүге раундта уҡ аяҡ һуҙырбыҙмы? Ә бит ундағы көсөргәнешлек иҫ киткес!
Екатеринбургта “Автомобилист”ҡа ҡаршы уйын яҡташтарыбыҙ өсөн хәйерле башланды. Матч башланып, алты минут үткәс тә, Роман Дерлюк гол керетте. Артабан хужаларҙың ике шайба индереүенә ҡарамаҫтан, өсөнсө осорҙа капитаныбыҙ Игорь Григоренко иҫәпте тигеҙләгәс, иркен тын алдыҡ. Бына бит уйындың һуңғы өлөшөндә көс беҙҙең яҡта! Әммә башҡаса уңыш йылмайманы. Киреһенсә, овертайм башында уҡ еңелеп ҡуйҙыҡ...