Донъяла даланлы кешеләр була бит. “Салауат Юлаев” командаһында ла шундай хоккейсы бар. Әнүәр Лисин ул.

Миҙгел башында Өфө клубына күскән һөжүм итеүсе Әнүәрҙең иҫәбендә бөгөнгә өс кенә гол. Ә бит 43 матч уҙҙы! Әммә уға ел-ямғыр теймәй. Көйәрмәндәрҙең түҙемлеге һынды тигәндә, бер мөһим шайба индерә ул. Әлбиттә, шунда уҡ бығаса булған хаталары ғәфү ителә.
...20 октябрь. “Салауат Юлаев” үҙ боҙонда “Аҡ Барыҫ” менән уйнай. Иҫәп тигеҙ – 1:1. Шунда Әнүәр тәүге голын керетте. Һөҙөмтәлә яҡташтарыбыҙ көслөрәк булып сыҡты.
...21 ноябрь. Йәнә шул күршеләр осраша. Юлаевсылар 3:0 иҫәбенә еңеп барғанда, ҡазандар ике шайба индереп, ҡыуып етте тиерлек. Тағы берәү... һәм көстәр тигеҙләшәсәк. Шул мәлдә Әнүәрҙең голы бик урынлы булды. 4:2 – был юлы ла “Салауат Юлаев” “Аҡ Барыҫ”ты отто.
...26 декабрь. Өфөлә – СКА командаһы. Ике клуб та бер тигеҙерәк мәрәй йыйып, бер ишерәк урында килә. Кем еңерен күҙаллап булмай. Шулай булып сыҡты ла. Төп ваҡыт бөтөүгә таблола 1:1 һандары яна ине. Овертайм, йәғни “тиҙ үлем”. Кем хәҙер шайба индерә, шул еңә! Юлаевсыларҙы әлеге лә баяғы Әнүәр Лисин ҡотҡарҙы – 2:1!
Ошонан һуң әйтеп ҡара, файҙаһыҙ хоккейсы, өс бөртөк голы бар тип... Иң мөһиме – Әнүәрҙе был даланы плей-офта ла ташламаһын. Унда бер яңылышлыҡ йәки бер бәхетле осраҡ барыһын да хәл итергә мөмкин.