Етеп килгән Яңы йыл шауҡымымы? Юлаевсылар ваҡытынан алда ялға киткәндәй тойола. Улай тиһәң, быйыл һуңғы матч 28 декабрҙә генә буласаҡ...

Ике аҙна эсендә бер үк “Спартак” командаһынан икенсегә еңелде “Салауат Юлаев”. Мәскәүҙәр плей-офҡа ла эләкмәй әле. Әммә характерҙары ныҡ икәне күренә. Ә өфөләр уларҙы һанламаны шикелле. Юғиһә уйын башланыр-башланмаҫ күпселектә ҡапҡаларына шайба индерттермәҫтәр ине. Күпселектә бит әле!
Тәүге ике осорҙо арлы-бирле үткәреп, һуңғыһында ең һыҙғаныу менәнме ни... Ваҡыт та, көс-ҡеүәт тә етмәне. Сами Леписте ғына бер тапҡыр уңышҡа өлгәшә алды.
Һөҙөмтәлә юлаевсылар 1:2 иҫәбенә отолдо. Хатта йоҙроҡ һуғышында Максим Гончаровтың еңеүе лә боҙолған кәйефте күтәрә алманы. Бөгөн СКА командаһына ҡаршы нисек уйнарҙар – күҙ күрер.