Тәнәфес бөттө Континенталь хоккей лигаһында. Ул арала “Беренсе канал кубогы”на турнирҙа Рәсәй йыйылма командаһы мәсхәрәгә ҡалды. Аҙаҡҡы урынды алды ул. Беҙҙең хоккейсылар арыны, тип сәбәбен тапты тренерҙар.

Ә шведтар арымаймы ни? “Салауат Юлаев” сафындағы Никлас Сведберг, Линус Умарк, Андреас Энгквистың һуңғы икәүһе үрҙә телгә алған ярышта ла һынатманы, шишәмбелә Мәскәүҙең “Дина­мо”һын ҡыйратыуға ла тос өлөш индерҙе. Ә Сведберг иһә уйындың төп геройы булып танылды.
Аҙаҡҡы ваҡытта “Динамо”ның эше бешмәй. Һөжүм итеү оҫталығы менән дан алған команда йыш отола. Юлаевсылар шунан файҙаланды ла инде. 2:0 иҫәбенә еңеүгә өлгәштеләр. Ләкин беҙҙең командала биш-алты кешенән башҡа ышаныслы хоккейсы булмауы күңелде ҡыра. Тиҙҙән – плей-офф. Лидерҙар йәрәхәтләнә башлаһа, кем уйнар?
Миҙгел алдынан күп кенә спортсылар менән хушлаштылар. Улар урынына килгәндәре өмөттө аҡламаны. Тимәк, Гагарин кубогын яулау хыялда ғына ҡаламы инде?..